दापोली : दापोली तालुक्यात सध्या सरीवर सरी पाऊस पडत असला तरी, मंगळवारी रात्री झालेल्या वादळी वाऱ्यामुळे जनजीवन काही प्रमाणात विस्कळीत झाले. दापोली-हर्णे मुख्य मार्गावर झाड कोसळल्याने अर्धा रस्ता बंद झाला होता, ज्यामुळे एकेरी वाहतूक सुरू होती.
दुपारनंतर तातडीने कार्यवाही करत रस्त्यावर पडलेले झाड बाजूला करून वाहतूक पूर्ववत करण्यात आली. याच वादळी वाऱ्याचा फटका सारंग गावालाही बसला. तेथे वीजखांब कोसळल्याने ग्रामस्थांना सलग दोन दिवस अंधाराचा सामना करावा लागला.
महावितरणच्या कर्मचाऱ्यांनी तातडीने पावले उचलत कोसळलेले वीज खांब पुन्हा उभे केले. तसेच वीज वाहिन्यांवरील झाडांच्या फांद्या छाटून वीजपुरवठा सुरळीत केला, त्यामुळे सारंग ग्रामस्थांना दिलासा मिळाला आहे.
