खेड: मुंबई-गोवा महामार्गावरील भरणे येथील मठासमोर बुधवारी रात्रीच्या सुमारास एका मालवाहू ट्रकने दिलेल्या धडकेत एक महिला गंभीर जखमी झाली. हा ट्रक चालवणारा चालक मद्यधुंद अवस्थेत असल्याने त्याने अनेक वाहनांना हुलकावणी दिल्याचे समोर आले आहे. पोलिसांनी या चालकाला तात्काळ ताब्यात घेतले आहे.
या घटनेबाबत अधिक माहिती अशी की, एमएच-०८/डब्ल्यू ९५२६ या क्रमांकाचा ट्रक लाकडे घेऊन दापोलीहून कोल्हापूरच्या दिशेने जात होता. चालकाने मद्यपान केल्यामुळे त्याला ट्रक नीट चालवता येत नव्हता. रस्त्यावरुन जाताना त्याने अनेक वाहनांना हुलकावणी दिली आणि त्याचवेळी रस्त्याने जाणाऱ्या एका महिलेला धडक दिली.
हा ट्रक भरणे येथील मठासमोर आल्यावर चालकाचे वाहनावरील नियंत्रण सुटले आणि ट्रक उलटला. या घटनेची माहिती मिळताच पोलिसांनी तात्काळ घटनास्थळी धाव घेतली. पोलिसांनी चालकाला ताब्यात घेतले असून त्याच्यावर गुन्हा दाखल करण्याची प्रक्रिया सुरू आहे. या बेजबाबदार कृत्यामुळे एक महिला जखमी झाली असून, महामार्गावरील सुरक्षा पुन्हा एकदा ऐरणीवर आली आहे.
