कोकण रेल्वे प्रवासी समन्वय आणि संघर्ष समितीच्या वतीने सिंधुदुर्ग रेल्वे स्थानक आवारात जन आंदोलन

सिंधुदुर्ग: रेल्वे प्रशासन हाय हाय जलद गाड्यांना थांबाच नाय…., कोकण रेल्वे कोणाची कोकणी माणसाची की परराज्याची…, म्हणे कोकणचा विकास रेल्वे स्टेशन मात्र भकास…!

आदी घोषणा देत सिंधुदुर्ग रेल्वे स्थानकालात सर्व गाड्या थांबल्याच पाहिजेत या प्रमुख मागणीसह अन्य मागण्यांकडे रेल्वे प्रशासनाचे लक्ष वेधण्यासाठी कोकण रेल्वे प्रवासी समन्वय आणि संघर्ष समिती सिंधुदुर्गच्यावतीने आज सिंधुदुर्ग रेल्वे स्थानकाच्या प्रवेशद्वारावर जनआंदोलन छेडण्यात आले. या आंदोलना जिल्हवासियांनी चांगला प्रतिसाद दिला.

कोकण रेल्वे प्रवासी समन्वय आणि संघर्ष समिती सिंधुदुर्ग या संघटनेच्या माध्यमातून सिंधुदुर्ग जिल्ह्यातील खारेपाटण ,वैभववाडी,आचिर्ने ,नांदगाव, कणकवली, सिंधुदुर्ग, कुडाळ,झाराप, सावंतवाडी ,मडूरा या सर्व दहा रेल्वे स्थानका वरील प्रवाशांना चांगल्या सोयी सुविधा मिळाव्यात आणि सिंधुदुर्ग जिल्ह्यामध्ये न थांबणाऱ्या सर्व जलद गाड्यांना सिंधुदुर्ग स्थानका सह विविध रेल्वे स्थानकावर कायमस्वरूपी थांबा मिळावा. यासाठी संघटनेमार्फत मागील तीन वर्षापासून मागणी केली जात आहे. यासाठी विविध लोकप्रतिनिधीसह संबंधित अधिकाऱ्यांशी पत्रव्यवहार करण्यात आला तसेच उपोषण करून लक्ष वेधन्यात आले तरीही अद्याप मागण्याची पूर्तता झालेली नाही. २७ ऑगस्टपासून कोकणातील सर्वात मोठा गणेशोत्सव साजरा होणार आहे. या सणासाठी येणाऱ्या चाकरमान्यांसाठी एकही गाडीची बुकिंग शिल्लक राहिलेली नाही. तरी गणेशोत्सवासाठी २० ऑगस्ट ते १० सप्टेंबर या कालावधी मडूरे ते दादर व सावंतवाडी ते दादर अशा दोन नवीन गाड्या तात्काळ सुरू कराव्यात तसेच प्रवाशांचा प्रतिसाद पाहून सदरील दोन्ही गाड्या कायमस्वरूपी चालू ठेवाव्यात. सिंधुदुर्ग रेल्वे स्थानकासह वैभववाडी व नांदगाव रेल्वे स्थानकावर आरक्षण खिडकीची सुविधा तात्काळ सुरू करावी. जिल्हा मुख्यालयाचे प्रमुख रेल्वे स्थानक असलेल्या सिंधुदुर्ग स्थानकावर लांब पल्ल्याच्या किमान पंधरा गाड्यांना थांबा मिळावा, सावंतवाडी रेल्वे स्थानकाचे सावंतवाडी टर्मिनस असे नामकरण करावे, सिंधुदुर्गातील सर्व रेल्वे स्थानकावरील कॅन्टीन तात्काळ सुरू कराव्यात, प्लॅटफॉर्म सुविधा नसलेल्या सर्व रेल्वे स्थानकावर प्लॅटफॉर्म सुविधा निर्माण करावी अशा विविध मागण्या या निवेदनातून करण्यात आले आहेत.या मागण्यांकडे लक्ष वेधण्यासाठी कोकण रेल्वे प्रवासी समन्वय आणि संघर्ष समिती च्या वतीने आज सिंधुदुर्ग रेल्वे स्थानकाबाहेर जनआंदोलन करण्यात आले. या आंदोलनांना प्रवासी संघटना, रिक्षा चालक मालक संघटना, राजकीय संघटना आणि पत्रकारांनी जाहीर पाठिंबा दिला. यावेळी संघटनेचे अध्यक्ष प्रकाश पावसकर, सचिव अजय मयेकर, उपाध्यक्ष परशुराम परब, नागेश ओरोसकर, शुभम परब यांच्यासह अनेक नागरिक उपस्थित होते.

काय ती झाडी काय तो प्लॅटफॉर्म बाहेर चकाचक आतून फकाफक

जिल्ह्यातील काही रेल्वे स्थानकाचे बाहेरून सुशोभिकरण करण्यात आले असले तरी अंतर्गत सुविधांची वानवा अद्याप कायम आहे. त्यामुळे आजच्या आंदोलनातील काय ती झाडी काय तो प्लॅटफॉर्म बाहेर चकाचक आतून फकाफक हा बॅनर सर्वांचे लक्ष वेधून घेत होता.