मुस्लिम एकल महिलांच्या प्रश्नांवर देवरूखमध्ये व्यापक चर्चा

देवरूख : येथे मुस्लिम एकल महिलांची विशेष बैठक झाली. अशा महिलांच्या विविध प्रश्नांवर यावेळी व्यापक चर्चा झाली.देवरूख आणि परिसर, कडवई आणि परिसरातील ३५ महिला आणि अनेक कार्यकर्ते बैठकीला जमले होते.

त्यापैकी १९ मुस्लिम एकल महिला होत्या. बैठकीत या महिलांनी आपले विविध प्रश्न मांडले. या महिलांसाठी असलेल्या विविध शासकीय योजनांची माहिती बैठकीत देण्यात आली. या योजनांसाठी लागणारी कागदपत्रे कशी मिळवायचीत, हेदेखील स्पष्ट करण्यात आले. उपस्थित असलेल्या व उपस्थित राहू न शकलेल्या तालुक्यातील सर्व मुस्लिम एकल महिलांना योजनांचा लाभ मिळवून देण्याचा संकल्प करण्यात आला.

एकल महिलांच्या शिकणाऱ्या मुलामुलींना विविध शिष्यवृत्त्या मिळवून देण्यासाठी देखील प्रयत्न करण्याचे ठरविण्यात आले. कोकणात तलाकपीडित महिलांची संख्या अतिशय कमी आहे. काही वाद झाल्यास मुस्लिम समाजातील धुरीण सामोपचाराने वाद मिटवण्यासाठी प्रयत्न करतात. सामंजस्य घडवून आणण्यासाठी प्रयत्न करतात. यामुळे तुटेपर्यंत ताणले जात नाही, असे वास्तवही स्पष्ट झाले. मुस्लिम समाज विकास संघ ही नोंदणीकृत संस्था जिल्ह्यात कार्यरत आहे. जिल्ह्यातील प्रत्येक तालुक्यातील दोन ज्येष्ठ कार्यकर्ते या समितीत असून १९ मुस्लिम कार्यकर्त्यांची ही संस्था मुस्लिम समाजातील विविध प्रश्न सोडवण्यासाठी निरंतर कार्यरत आहे. या संस्थेचे उपाध्यक्ष व ज्येष्ठ सामाजिक कार्यकर्ते आयूब कापडी यांनी विविध शासकीय योजनांसाठी लागणारी कागदपत्रे मिळवून देण्यासाठी पाठपुरावा बैठक आयोजित केली आहे.

कडवई येथील ज्येष्ठ सामाजिक कार्यकर्ते श्री. काझी आपल्या अनेक सहकाऱ्यांसह उपस्थित होते. त्यांच्या प्रयत्नातून कडवई येथील सात मुस्लिम एकल महिला, देवरूख येथील ज्येष्ठ सामाजिक कार्यकर्ते डॉ. शेख उपस्थित होते. ज्यांचा सहभाग, सल्ला व मार्गदर्शनाने कोकणातील महत्त्वाचे सामाजिक कार्य पुढे सरकत असते.

आयूब कापडी, डॉ. शेख, श्री. काझी, रुबिना चव्हाण, युयुत्सु आर्ते व प्रदीप गुरव यांची समिती स्थापन करण्यात आली असून तालुक्यातील प्रत्येक मुस्लिम एकल महिलेला हक्काची योजना मिळेपर्यंत पाठपुरावा करण्याचा संकल्प बैठकीत करण्यात आला.