चिपळुणातील लाचखोर मंडळ अधिकाऱ्याच्या मालमत्तेची चौकशी; उमेश राजेशिर्केला एक दिवसाची पोलीस कोठडी

चिपळूण : फेरफार नोंद मंजूर करण्यासाठी १० हजार रुपयांची लाच स्वीकारताना रंगेहाथ पकडण्यात आलेला मंडळ अधिकारी उमेश राजाराम राजेशिर्के (वय ५२) याला न्यायालयाने एक दिवसाची पोलीस कोठडी सुनावली आहे. दरम्यान, राजेशिर्के याने कमावलेल्या सर्व प्रकारच्या मालमत्ता व संपत्तीची चौकशी करण्यात येणार असल्याची माहिती समोर आली आहे.

तक्रारदाराने मौजे चिपळूण येथील भूमापन क्रमांक १७४/१३ ही जागा खरेदी केली होती. या जमिनीच्या ७/१२ उताऱ्यावर स्वतःचे व पत्नीचे नाव दाखल होऊन फेरफार मंजूर व्हावा, यासाठी तक्रारदाराने संबंधित कार्यालयात अर्ज केला होता. त्यानुसार ११ जून २०२६ रोजी फेरफार नोंद घेण्यात आली होती. मात्र, मंडळ अधिकारी उमेश राजेशिर्के यांनी ७ जुलै २०२६ रोजी ही नोंद रद्द केली.

त्यानंतर तक्रारदाराने महसूल कर्मचारी पतसंस्थेत राजेशिर्के यांची भेट घेतली. रद्द झालेली फेरफार नोंद मंजूर करण्यासाठी राजेशिर्के यांनी १० हजार रुपयांच्या लाचेची मागणी केल्याचा आरोप आहे. तक्रारदाराने लाचेची रक्कम देण्यास नकार दिल्यानंतरही २३ आणि २७ ऑगस्ट रोजी फोन करून फेरफार नोंद मंजूर करण्यासाठी लाचेच्या रकमेसाठी तगादा लावण्यात आला.

या प्रकारानंतर तक्रारदाराने २ सप्टेंबर रोजी रत्नागिरी येथील लाचलुचपत प्रतिबंधक विभागाकडे लेखी तक्रार केली. तक्रारीची पडताळणी केल्यानंतर बुधवारी सायंकाळी तक्रारदाराच्या गाडीत १० हजार रुपयांची लाच स्वीकारताना पथकाने उमेश राजेशिर्के याला रंगेहाथ पकडले.

गुरुवारी त्याला न्यायालयात हजर करण्यात आले. न्यायालयाने त्याला एक दिवसाची पोलीस कोठडी सुनावली. या प्रकरणाचा तपास सुरू असून, राजेशिर्के यांच्या मालमत्ता आणि संपत्तीबाबतही चौकशी केली जाणार आहे. त्यामुळे या कारवाईनंतर त्यांच्या आर्थिक व्यवहारांसह संपत्तीच्या स्रोतांकडेही तपास यंत्रणेचे लक्ष लागले आहे.