दापोलीत व्हायरल ऑडिओ क्लिपमुळे अडचणीत आलेले शिंदे सेनेचे प्रसाद रेळेकर यांचा राजीनामा

दापोली : दापोलीतील शिंदे सेनेचे शहरप्रमुख प्रसाद ऊर्फ पप्पू रेळेकर यांनी शहरप्रमुख पदाचा राजीनामा दिल्याने दापोलीच्या राजकीय वर्तुळात खळबळ उडाली आहे. गेल्या काही दिवसांपासून चर्चेत असलेल्या कथित ऑडिओ क्लिपनंतर पक्षांतर्गत घडामोडींना वेग आला असून, त्यानंतर रेळेकर यांनी राजीनामा दिल्याची चर्चा आहे.

व्हायरल झालेल्या ऑडिओ क्लिपमध्ये ई-शिवाई बस कर्मचाऱ्यांशी संभाषण असल्याचे सांगितले जात आहे. ई-शिवाई बसचालकांच्या ड्युटी लावण्याच्या विषयावरून कर्मचाऱ्याला धमकावले जात असल्याचा आरोप या ऑडिओच्या माध्यमातून करण्यात येत आहे. तसेच बस जाळून टाकण्याचा इशारा देण्यात आल्याचेही या क्लिपबाबत सांगितले जात आहे. या ऑडिओ क्लिपची सत्यता स्वतंत्रपणे स्पष्ट झालेली नसली तरी त्यावरून राजकीय चर्चेला उधाण आले आहे.

या प्रकरणात राज्याचे मंत्री योगेश कदम यांच्या नावाचा उल्लेख असल्याचेही सांगितले जात आहे. तसेच ‘उपऱ्या-सुपाऱ्या मानत नाही’ अशा आशयाच्या वक्तव्यामुळे शिंदे सेनेतील जुने आणि इतर पक्षांतून आलेले कार्यकर्ते यांच्यातील मतभेदांचा मुद्दा चर्चेत आला आहे.

दरम्यान, माजी मंत्री रामदास कदम यांनीही या प्रकरणाकडे लक्ष वेधून संबंधितांची कानउघाडणी केल्याची चर्चा राजकीय वर्तुळात आहे. त्यामुळे दापोलीतील शिंदे सेनेतील अंतर्गत मतभेद पुन्हा एकदा चव्हाट्यावर आल्याचे चित्र निर्माण झाले आहे.

काही दिवसांपूर्वी प्रसाद रेळेकर यांनी दापोली शहरात भावी नगराध्यक्ष म्हणून बॅनर लावल्याने नगरपंचायत निवडणुकीच्या पार्श्वभूमीवरही राजकीय चर्चा रंगली होती. आता त्यांच्या राजीनाम्यामुळे या चर्चेला आणखी वेगळे वळण मिळाले आहे.

रेळेकर यांच्या राजीनाम्यामुळे दापोली शिंदे सेनेतील अंतर्गत मतभेद उघडपणे समोर आले आहेत का, असा प्रश्न उपस्थित होत आहे. आगामी स्थानिक स्वराज्य संस्थांच्या निवडणुकांच्या पार्श्वभूमीवर या राजीनाम्याचा पक्षाच्या स्थानिक राजकारणावर काय परिणाम होणार, याकडे राजकीय वर्तुळाचे लक्ष लागले आहे.