दापोली: हाँगकाँग येथे नुकत्याच संपन्न झालेल्या ७ व्या आशियाई ट्रॅम्पोलिन जिम्नॅस्टिक्स अजिंक्यपद स्पर्धेत रत्नागिरी जिल्ह्यातील दापोलीच्या अवघ्या १३ वर्षीय नकुल भावेश कारेकर याने आपल्या कौशल्याची चुणूक दाखवत आंतरराष्ट्रीय स्तरावर भारताचा दबदबा निर्माण केला आहे. मूळचा मांदिवली गावचा रहिवासी असलेल्या नकुलने या प्रतिष्ठेच्या स्पर्धेत अत्यंत तगड्या प्रतिस्पर्ध्यांना टक्कर देत अंतिम फेरीत धडक मारली आणि सहावे स्थान पटकावले. नकुलच्या या कामगिरीमुळे केवळ दापोली तालुकाच नव्हे, तर संपूर्ण महाराष्ट्राच्या क्रीडा विश्वात आनंदाचे वातावरण पसरले आहे.
आंतरराष्ट्रीय स्तरावरील या स्पर्धेत सहभागी होत नकुलने दाखवलेली जिद्द आणि तंत्रशुद्ध जिम्नॅस्टिक्समुळे त्याने उपस्थित क्रीडाप्रेमींचे लक्ष वेधून घेतले. ग्रामीण भागातून आलेल्या नकुलने जागतिक स्तरावरील स्पर्धकांशी संघर्ष करत मिळवलेले हे यश अत्यंत मोलाचे आहे. आशियाई स्पर्धेतील या यशानंतर नकुलने आता आगामी ‘वर्ल्ड चॅम्पियनशिप’ स्पर्धेवर लक्ष केंद्रित केले असून, प्रशिक्षक आणि जाणकारांच्या मते तो भविष्यात ऑलिम्पिकपर्यंत देशाचे प्रतिनिधित्व करण्यास सज्ज आहे.
नकुलच्या या यशाने दुर्गम आणि ग्रामीण भागातील युवा खेळाडूंसाठी एक नवी उमेद निर्माण झाली असून, जिद्द आणि कठोर परिश्रमाच्या जोरावर जागतिक मंचावर यश संपादन करता येते, हे त्याने सिद्ध केले आहे. त्याच्या या ऐतिहासिक कामगिरीमुळे दापोली आणि मंडणगड परिसरातील लोकप्रतिनिधी, क्रीडा मंडळे तसेच विविध स्तरांतून नकुलवर अभिनंदनाचा वर्षाव होत आहे. ग्रामीण महाराष्ट्राच्या मातीतला हा उदयोन्मुख तारा भविष्यात देशाचे नाव नक्कीच अधिक उंचावेल, असा विश्वास क्रीडा प्रेमींकडून व्यक्त केला जात आहे.
