चिपळूण: अलोरे गावची सुकन्या आणि जिद्दीची मूर्ती असलेल्या दिव्या देवदास चिपळूणकर हिने ‘मिसेस महाराष्ट्र २०२६’ या प्रतिष्ठेच्या स्पर्धेत घवघवीत यश संपादन करत ‘सेकंड रनर अप’ हा मानाचा किताब पटकावला आहे. लहानपणापासूनच राज्यस्तरीय नृत्यस्पर्धा आणि मॉडेलिंग क्षेत्रात आपला ठसा उमटवणाऱ्या दिव्याने लग्नानंतरचा तब्बल बारा वर्षांचा प्रदीर्घ काळ पेण येथील आपल्या सासरी कौटुंबिक जबाबदाऱ्या सांभाळण्यात व्यतीत केला.
पाच वर्षांच्या मुलाचे संगोपन करत असतानाच तिने कंटेंट क्रिएटर म्हणूनही स्वतःची ओळख निर्माण केली आणि अनेक नामांकित ब्रँड्ससाठी सर्जनशील डिजिटल कंटेंट तयार करण्याचे कामही उत्तमरीत्या हाताळले. संसाराच्या जबाबदाऱ्यांमध्येही आपले स्वप्न जिवंत ठेवणाऱ्या दिव्याने बारा वर्षांच्या मोठ्या खंडानंतर नवी मुंबई येथे आयोजित या स्पर्धेत जिद्दीने सहभाग घेतला आणि यश खेचून आणले. तिच्या या यशाने ‘स्वप्नाला जिद्दीची जोड असेल, तर वय कधीच अडथळा ठरू शकत नाही’ हा संदेश पुन्हा एकदा अधोरेखित केला आहे. दिव्याच्या या यशाबद्दल अलोरे पंचक्रोशीतील ग्रामस्थांनी आणि तिच्या चाहत्यांनी तिचे मनापासून अभिनंदन केले असून, सर्वत्र आनंदाचे वातावरण पसरले आहे.
