रत्नागिरी : राज्य परीक्षा परिषद, पुणे यांच्या वतीने घेण्यात आलेल्या इयत्ता पाचवी शिष्यवृत्ती परीक्षा 2026 च्या निकालात गुरुवर्य एम. एन. जोशी इंग्लिश मीडियम स्कूलच्या विद्यार्थ्यांनी उल्लेखनीय यश संपादन करत शाळेच्या शैक्षणिक गुणवत्तेची पुन्हा एकदा प्रचिती दिली आहे. विद्यार्थ्यांच्या या यशामुळे शाळा, शिक्षक, पालक आणि शैक्षणिक क्षेत्रात आनंदाचे वातावरण निर्माण झाले आहे.
शाळेतील विद्यार्थिनी अस्मि राडये हिने 256 गुण मिळवत रत्नागिरी जिल्हा गुणवत्ता यादीत सातवा क्रमांक पटकावला. तर स्वरूप गडदे याने 234 गुण मिळवून जिल्हा गुणवत्ता यादीत 29 वा क्रमांक मिळवत उल्लेखनीय यश संपादन केले. दोन्ही विद्यार्थ्यांनी आपल्या उत्कृष्ट कामगिरीमुळे शाळेचे नाव जिल्हाभर उज्ज्वल केले आहे.
शिष्यवृत्ती परीक्षा ही विद्यार्थ्यांच्या बौद्धिक क्षमतेची, आकलनशक्तीची आणि सातत्यपूर्ण अभ्यासाची कसोटी मानली जाते. या स्पर्धात्मक परीक्षेत यश मिळवण्यासाठी विद्यार्थ्यांनी नियमित अभ्यास, जिद्द आणि चिकाटीच्या बळावर मेहनत घेतली. त्यांना शिक्षकांचे नियोजनबद्ध मार्गदर्शन तसेच पालकांचे सातत्यपूर्ण प्रोत्साहन लाभल्याने हे यश शक्य झाल्याची भावना व्यक्त करण्यात आली.
गुरुवर्य एम. एन. जोशी इंग्लिश मीडियम स्कूलमध्ये विद्यार्थ्यांच्या सर्वांगीण विकासासोबत गुणवत्तापूर्ण शिक्षणावर विशेष भर दिला जातो. विद्यार्थ्यांना स्पर्धा परीक्षांसाठी आवश्यक मार्गदर्शन, सराव परीक्षा आणि वैयक्तिक शैक्षणिक मार्गदर्शन दिले जात असल्याने शाळेची यशाची परंपरा कायम राहिली आहे.
या उल्लेखनीय यशाबद्दल दि न्यू एज्युकेशन सोसायटी, शाळेचे मुख्याध्यापक, शिक्षकवृंद, शिक्षकेतर कर्मचारी तसेच पालकांनी दोन्ही गुणवंत विद्यार्थ्यांचे अभिनंदन केले. त्यांच्या भावी शैक्षणिक वाटचालीसाठी शुभेच्छा देत भविष्यातही अशाच यशाची अपेक्षा व्यक्त करण्यात आली.
