संगलट तंटामुक्त समितीच्या अध्यक्षपदी सत्तार भाई नाडकर यांची सलग दुसऱ्या वर्षी एकमताने निवड

खेड (प्रतिनिधी) : खेड तालुक्यातील संगलट गावच्या महात्मा गांधी तंटामुक्त समितीच्या अध्यक्षपदी सामाजिक कार्यकर्ते सत्तार जाफर नाडकर यांची सलग दुसऱ्या वर्षी एकमताने निवड करण्यात आली आहे. त्यांच्या निवडीमुळे संगलट गावात आनंदाचे वातावरण असून, ग्रामस्थांकडून नाडकर यांच्यावर अभिनंदनाचा वर्षाव होत आहे.

सत्तार भाई नाडकर हे संगलट गावातील सामाजिक कार्यात सातत्याने सक्रिय असून, सर्व समाजघटकांशी सलोख्याचे संबंध जपणारे व्यक्तिमत्त्व म्हणून त्यांची ओळख आहे. गावात कोणतीही सामाजिक समस्या अथवा अडचण निर्माण झाल्यास सर्वप्रथम मदतीसाठी धावून जाणाऱ्या व्यक्ती म्हणून त्यांच्याकडे पाहिले जाते. सर्व समाजघटकांना सोबत घेऊन गावातील प्रश्न मार्गी लावण्याची त्यांची भूमिका आणि सर्वांशी असलेला मनमिळाऊ स्वभाव यामुळे त्यांनी ग्रामस्थांमध्ये विशेष लोकप्रियता मिळवली आहे.

गावातील सामाजिक सलोखा, शांतता आणि परस्पर सामंजस्य कायम ठेवण्यासाठी तंटामुक्त समितीची भूमिका महत्त्वाची मानली जाते. या पार्श्वभूमीवर नाडकर यांच्यावर पुन्हा एकदा अध्यक्षपदाची जबाबदारी सोपविण्यात आल्याने त्यांच्या कार्याची ग्रामस्थांनी दखल घेतल्याचे मानले जात आहे. सलग दुसऱ्या वर्षी एकमताने निवड झाल्याबद्दल ग्रामस्थ, सामाजिक कार्यकर्ते आणि विविध समाजघटकांकडून सत्तार भाई नाडकर यांचे अभिनंदन करण्यात येत आहे.