कारच्या धडकेत दाम्पत्य जखमी; खेड पोलिसांत गुन्हा दाखल

खेड : मुंबई-गोवा महामार्गावरील भरणे (ता. खेड) येथील पेट्रोलपंपाजवळ दुचाकीला कारने धडक दिल्याची घटना बुधवारी, १२ ऑगस्ट रोजी सायंकाळी घडली. या अपघातात दुचाकीवरून प्रवास करणारे दाम्पत्य जखमी झाले.

राजेश मोहिते आणि त्यांच्या पत्नी सुहानी राजेश मोहिते (दोघेही रा. हेदली-बौद्धवाडी, खेड) हे दुचाकीवरून प्रवास करत होते. यावेळी गोव्याहून मुंबईच्या दिशेने जाणाऱ्या कारने त्यांच्या दुचाकीला धडक दिली. या धडकेत दोघांनाही दुखापत झाली.

या प्रकरणी कारचालक पार्थ जितेंद्र रावत (२८, रा. विलेपार्ले पूर्व, मुंबई) याच्याविरोधात खेड पोलीस ठाण्यात गुन्हा दाखल करण्यात आला आहे. अपघाताची नोंद करून पोलिसांकडून पुढील तपास सुरू आहे.