सातारा-पुणे महामार्गावर ट्रकच्या धडकेत रत्नागिरीतील तरुणीचा मृत्यू; दोघे जखमी

रत्नागिरी : सातारा-पुणे महामार्गालगत शिंदेवाडी पुलाखालील सर्व्हिस रोडवर भरधाव ट्रकने दुचाकीला पाठीमागून जोरदार धडक दिल्याने झालेल्या भीषण अपघातात रत्नागिरीतील २१ वर्षीय तरुणीचा दुर्दैवी मृत्यू झाला. संस्कृती राजू पिसे (वय २१, रा. कोकणनगर, ता. जि. रत्नागिरी) असे मृत तरुणीचे नाव आहे. या अपघातात प्रतिक राजेंद्र ओतारी (वय २७, रा. शिरवळ, ता. खंडाळा, जि. सातारा) आणि ऋतिक हे दोघे जखमी झाले आहेत. ही हृदयद्रावक घटना १९ ऑगस्ट रोजी पहाटे सुमारे १.४५ वाजण्याच्या सुमारास घडली.

पोलिसांनी दिलेल्या माहितीनुसार, प्रतिक ओतारी, ऋतिक आणि संस्कृती हे तिघे ऋतिकच्या दुचाकीवरून शिंदेवाडी गावच्या हद्दीत सातारा-पुणे महामार्गालगत असलेल्या सर्व्हिस रोडने प्रवास करीत होते. त्याचवेळी करमहुसेन गयासुदिदन चौधरी (रा. आमगाव, तहसील नौगड, जि. नौगड, उत्तर प्रदेश) हा त्याच्या ताब्यातील ट्रक साताऱ्याकडून पुण्याच्या दिशेने घेऊन जात होता.

शिंदेवाडी पुलाखाली आल्यानंतर भरधाव वेगातील ट्रकने दुचाकीला पाठीमागून जोरदार धडक दिली. धडकेची तीव्रता एवढी होती की, दुचाकी काही अंतरापर्यंत ट्रकसोबत ओढली गेल्याचे फिर्यादीत नमूद करण्यात आले आहे. या भीषण धडकेत संस्कृती पिसे हिला गंभीर दुखापत झाली. उपचारापूर्वीच अथवा उपचारादरम्यान तिचा दुर्दैवी मृत्यू झाला.

या अपघातात प्रतिक ओतारी आणि ऋतिक हे दोघेही जखमी झाले असून दुचाकीचेही मोठे नुकसान झाले आहे. एका क्षणात झालेल्या या अपघातामुळे तिघांच्या प्रवासाला काळाचा घाला बसला आणि रत्नागिरीच्या संस्कृतीचा दुर्दैवी अंत झाला.

दरम्यान, अपघातानंतर ट्रकचालकाने घटनास्थळी ट्रक सोडून तेथून पळ काढल्याचे फिर्यादीत नमूद करण्यात आले आहे. याप्रकरणी प्रतिक राजेंद्र ओतारी यांनी राजगड पोलीस ठाण्यात फिर्याद दाखल केली. त्यानुसार पोलिसांनी ट्रकचालक करमहुसेन गयासुदिदन चौधरी याच्याविरुद्ध भारतीय न्याय संहितेतील विविध कलमांसह मोटार वाहन कायद्यानुसार गुन्हा दाखल केला आहे.

ट्रकचालकाने वाहतुकीच्या नियमांकडे दुर्लक्ष करून वाहन भरधाव व निष्काळजीपणे चालविल्याचा आरोप फिर्यादीत करण्यात आला आहे. अपघात नेमका कशामुळे घडला, चालकाचा निष्काळजीपणा किती कारणीभूत ठरला आणि अपघाताच्या वेळी नेमकी परिस्थिती काय होती, याचा तपास राजगड पोलीस करीत आहेत.

या प्रकरणाचा पुढील तपास पोलीस हवालदार गायकवाड करीत असून, प्रभारी अधिकारी पोलीस निरीक्षक जाधव यांच्या मार्गदर्शनाखाली तपास सुरू आहे.