दापोली: मिरज (सांगली) येथील बालगंधर्व नाट्यगृहात ३० ऑगस्ट रोजी अत्यंत उत्साहात पार पडलेल्या ‘राष्ट्रीय क्रीडा अधिवेशन २०२६’ मध्ये दापोलीच्या क्रीडापटूंनी आपल्या कौशल्याचा ठसा उमटवत राष्ट्रीय पातळीवर बहुमान पटकावला आहे. मेजर ध्यानचंद केंद्रीय क्रीडा समिती, नवी दिल्ली (भारत) यांच्या वतीने आयोजित या सोहळ्यात दापोलीतील तीन गुणवंत खेळाडूंना प्रतिष्ठेच्या ‘सुवर्णलक्ष’ पुरस्काराने, तर क्रीडा प्रशिक्षक कविता शिंदे यांना ‘हिंदरत्न’ पुरस्काराने सन्मानित करण्यात आले.
स्वाभिमानी शेतकरी संघटनेचे प्रमुख राजू शेट्टी आणि माजी आमदार दिनकर पाटील यांच्यासह अनेक मान्यवरांच्या प्रमुख उपस्थितीत हा भव्य क्रीडा गौरव सोहळा संपन्न झाला. राष्ट्रीय तसेच आंतरराष्ट्रीय लाठीकाठी व दांडपट्टा स्पर्धेत सुवर्णपदक पटकावून देशाचा नावलौकिक वाढवल्याबद्दल दापोलीचे खेळाडू अनय बाळ, वैष्णवी मिसाळ आणि अमोल धयाळकर यांना मान्यवरांच्या हस्ते ‘सुवर्णलक्ष राष्ट्रीय क्रीडा पुरस्कार २०२६’ देऊन गौरविण्यात आले.
याच सोहळ्यात क्रीडा क्षेत्रातील अतुलनीय योगदानाबद्दल कविता शिंदे यांचा विशेष गौरव करण्यात आला. ग्रामीण भागातील मुलींना लाठीकाठी तसेच महाराष्ट्राचे राज्यशस्त्र असणाऱ्या दांडपट्ट्याचे शास्त्रोक्त प्रशिक्षण देऊन त्यांना सक्षम बनवण्याचे मोठे कार्य कविता शिंदे यांनी सातत्याने केले आहे. त्यांच्या याच कार्याची दखल घेत केंद्रीय समितीने त्यांना स्मृतीचिन्ह व प्रमाणपत्र देऊन ‘हिंदरत्न शेर-ए-हिंदुस्थान’ पुरस्काराने सन्मानित केले.
या सर्व गुणवंत खेळाडूंना कराटेचे आंतरराष्ट्रीय खेळाडू तसेच लाठीकाठी व दांडपट्टा या क्रीडा प्रकारांचे राष्ट्रीय पंच सुरेंद्र शिंदे यांचे मोलाचे मार्गदर्शन लाभले आहे. दापोलीच्या शिरपेचात मानाचा तुरा रोवणाऱ्या या सर्व क्रीडापटूंचे आणि प्रशिक्षकांचे संपूर्ण दापोलीकरांकडून उत्स्फूर्त कौतुक होत असून, त्यांच्या भावी वाटचालीस शुभेच्छा दिल्या जात आहेत.
