रायगड : जिल्ह्याला पुन्हा एकदा अपघाताच्या काळ्याधोरणाची झळ बसली आहे. पनवेल येथील देवयानी गोळे (वय १९) या तरुण विद्यार्थिनीचा रोह्याजवळ झालेल्या दुर्दैवी अपघातात मृत्यू झाला.
गणेशोत्सवाच्या आनंदासाठी गावी परतलेली देवयानी परत कधीच येणार नाही, यावर कोणाचाही विश्वास बसत नाही.
देवयानी ही पनवेलच्या एका महाविद्यालयात बीएमएसच्या अंतिम वर्षात शिक्षण घेत होती. गणपती साजरा करण्यासाठी भावासोबत स्कूटरवरून रोह्याजवळील मामाच्या घरी जात असताना, एका धाब्याजवळ त्यांच्या दुचाकीला एसटी बसने पाठीमागून जोरदार धडक दिली. धडकेचा जोर एवढा होता की देवयानीचा जागीच मृत्यू झाला, तर तिचा भाऊ गंभीर जखमी झाला आहे. त्याच्यावर सध्या रुग्णालयात उपचार सुरू आहेत.
१८ वर्षांपासून सुरु असलेल्या महामार्गाच्या कामावर पुन्हा प्रश्नचिन्ह
मुंबई-गोवा महामार्ग हा विकासाचे दार उघडणारा रस्ता मानला जातो, पण गेल्या दोन दशकांपासून चाललेले आणि अद्याप अपूर्ण असलेले रुंदीकरणाचे काम अनेक अपघातांना कारणीभूत ठरत आहे. सलग दोन दिवसांत दोन तरुणींना प्राण गमवावा लागल्यामुळे जिल्ह्यात हळहळ व्यक्त होत आहे. नागरिकांमध्ये संतापाचा सूर आहे.
‘तिचं स्वप्न अधुरं राहिलं’ – परिसरात शोककळा
देवयानीचं आयुष्य नुकतंच उंच भरारी घेण्याच्या मार्गावर होतं. अभ्यासात हुशार, गुणी आणि हसतमुख स्वभावाची ही तरुणी भविष्याची स्वप्न घेऊन वाटचाल करत होती. तिच्या अचानक जाण्याने केवळ तिचे कुटुंबच नव्हे, तर संपूर्ण गाव शोकाकुल झाला आहे. गणेशोत्सवाच्या पूर्वसंध्येला घडलेली ही दुर्घटना आभाळच कोसळल्यासारखी आहे.
हाच क्षण योग्य आहे – आता तरी सरकारने जागं व्हावं!
हा अपघात कोणाचं वैयक्तिक अपयश नाही, तर एक व्यवस्थात्मक चूक आहे. प्रत्येक अपघातानंतर फक्त आकडे नोंदवले जातात, पण त्यामागची माणसं, त्यांची स्वप्नं, त्यांचे कुटुंबीय हे आकड्यांच्या बाहेरचे वास्तव असते.
देवयानीसारखी तरुणी गेली, पण आता तरी प्रशासनाने आणि संबंधित यंत्रणांनी जागं व्हायला हवं. अपघात टाळण्यासाठी ठोस पावलं उचलणं ही आता काळाची गरज आहे – कारण प्रत्येक अपघात ही एक पूर्वसूचना असते… आणखी एका अश्रूंच्या कहाणीची.
