खेड/प्रतिनिधी: मुंबई-गोवा महामार्गावरील जिते गावाजवळ रविवारी मध्यरात्रीच्या सुमारास लोखंडी पाईप्स घेऊन जाणाऱ्या एका मालवाहू ट्रकला अचानक भीषण आग लागल्याची गंभीर घटना घडली आहे. सुदैवाने, ट्रकचालकाच्या प्रसंगावधानामुळे कोणतीही मोठी जीवितहानी टळली असली, तरी या आगीमुळे महामार्गावरील वाहतूक पूर्णपणे ठप्प झाली आणि दोन्ही बाजूंना वाहनांच्या लांबच लांब रांगा लागल्याने प्रवाशांना मध्यरात्री मनस्ताप सहन करावा लागला.
मिळालेल्या माहितीनुसार, हा ट्रक लोखंडी पाईप्स घेऊन जात असताना जितेनजीक त्याला अचानक आग लागल्याचे चालकाच्या लक्षात आले. आग वेगाने पसरू लागल्याचे पाहून चालकाने जराही विलंब न करता, तात्काळ महामार्गाच्या कडेला सुरक्षितपणे ट्रक थांबवला आणि केबिनमधून बाहेर पडला. चालकाच्या या सतर्कतेमुळे ट्रकचे मोठे नुकसान झाले असले तरी, परिसरातील मोठी हानी टळली. घटनेची माहिती मिळताच स्थानिक पोलीस आणि अग्निशमन दलाचे जवान तात्काळ घटनास्थळी दाखल झाले. अग्निशमन दलाच्या जवानांनी तात्काळ पाण्याचा मारा करत वेगाने पसरणाऱ्या या भीषण आगीवर नियंत्रण मिळवण्यासाठी शर्थीचे प्रयत्न केले. अथक प्रयत्नांनंतर जवानांना आगीवर पूर्णपणे नियंत्रण मिळवण्यात यश आले. जर वेळीच आग विझवली गेली नसती, तर लोखंडी पाईप्सचा हा साठा आणि ट्रक पूर्णपणे जळून खाक झाला असता, शिवाय महामार्गावर मोठा धोका निर्माण होण्याची शक्यता होती. मात्र, या घटनेमुळे महामार्गावरील वाहतूक दोन्ही बाजूंनी ठप्प झाली आणि वाहनांच्या रांगा लागल्या.
मध्यरात्री झालेल्या या प्रकारामुळे अनेक तास वाहतूक विस्कळीत झाल्याने प्रवाशांना मोठा मनस्ताप झाला. स्थानिक पोलिसांनी घटनास्थळी पोहून मदतकार्य केले आणि वाहतूक सुरळीत करण्यासाठी प्रयत्न केले. आगीचे नेमके कारण अद्याप समजू शकलेले नाही. या घटनेमुळे अन्य वाहनचालकांमध्ये भीतीचे वातावरण पसरले होते, पोलीस अधिक तपासणी करत आहेत.
