देवरूख: संगमेश्वर पंचायत समितीच्या शिक्षण विभागाचे गटशिक्षणाधिकारी म्हणून विजय अशोक परीट यांची नुकतीच नियुक्ती झाली असून, त्यांनी या महत्त्वाच्या पदाचा कार्यभार स्वीकारला आहे. शिक्षण क्षेत्रातील त्यांच्या अनुभवामुळे आणि पूर्वीच्या यशस्वी कामामुळे त्यांच्या नियुक्तीने या विभागाला एक सक्षम नेतृत्व लाभले आहे.
यापूर्वी गटशिक्षणाधिकारीपदाचा प्रभारी कार्यभार शशिकांत त्रिभुवने यांच्याकडे होता. त्यांच्याकडून श्री. परीट यांनी अधिकृतपणे पदभार हाती घेतला आहे. परीट यांच्या रुजू होण्याने संगमेश्वर तालुक्यातील शैक्षणिक कामकाजाला नवी गती मिळेल, अशी अपेक्षा व्यक्त होत आहे.
मूळचे वाळवा तालुक्यातील कासेगाव येथील रहिवासी असलेले विजय परीट यांचा प्रशासकीय तसेच शिक्षण क्षेत्राचा प्रदीर्घ अनुभव आहे. यापूर्वी ते पाटण येथे शालेय पोषण आहार अधीक्षक या पदावर कार्यरत होते. विशेष म्हणजे, त्यांनी मुंबई विभागात आयकर अधिकारी म्हणूनही महत्त्वपूर्ण काम केले आहे. प्रशासकीय कामकाजाचा अनुभव आणि शिक्षण विभागाची सखोल माहिती यामुळे संगमेश्वरच्या शिक्षण विभागाच्या धोरणात्मक निर्णयांमध्ये त्यांची भूमिका निर्णायक ठरू शकेल.
विजय परीट यांच्या नियुक्तीबद्दल विविध शिक्षण संघटनांच्या पदाधिकाऱ्यांनी त्यांचे स्वागत केले असून, त्यांना भावी कार्यासाठी शुभेच्छा दिल्या आहेत. तालुक्यातील शिक्षणाचे गुणवत्ता वाढावी, यासाठी ते प्रभावीपणे काम करतील, असा विश्वास या संघटनांनी व्यक्त केला आहे. त्यांच्या नेतृत्वाखाली तालुक्यातील प्राथमिक आणि माध्यमिक शिक्षणाच्या प्रगतीकडे लक्ष लागले आहे.
