लांजा: तालुक्यातील कुर्णे येथे झालेल्या ४५ वर्षीय व्यक्तीच्या खून प्रकरणी अटक करण्यात आलेल्या आरोपीला न्यायालयाने ५ दिवसांची पोलीस कोठडी सुनावली आहे. कुर्णे पडयेवाडी येथील सुरेश रामचंद्र पडये यांचा मृतदेह २० जानेवारी रोजी त्यांच्या राहत्या घरी संशयास्पद स्थितीत आढळल्यानंतर परिसरात तीव्र खळबळ उडाली होती. या घटनेचे गांभीर्य ओळखून लांजा पोलिसांनी तपासाची चक्रे अत्यंत वेगाने फिरवली आणि अवघ्या २४ तासांच्या आत या गुन्ह्याचा छडा लावत संशयिताला बेड्या ठोकल्या.
पोलिसांनी तपासादरम्यान मिळालेल्या माहितीनुसार कुर्णे सुतारवाडी येथील २५ वर्षीय नंदकुमार पांचाळ याला संशयावरून ताब्यात घेतले होते. पोलिसांच्या सखोल चौकशीत त्याने खुनाची कबुली दिल्यानंतर त्याला अधिकृतरीत्या अटक करण्यात आली. अटकेनंतर आरोपीला न्यायालयासमोर हजर केले असता, या कृत्यामागील नेमके कारण आणि गुन्ह्यातील इतर दुवे शोधण्यासाठी न्यायालयाने त्याला पाच दिवसांची पोलीस कोठडी सुनावली आहे. या संपूर्ण प्रकरणाचा पुढील तपास लांजा पोलीस करत असून, या घटनेने शांत असलेल्या कुर्णे परिसरात मोठी चर्चा सुरू आहे.
