राजापूर : तालुक्यातील देवाचेगोठणे येथे आयुष आरोग्यमंदिर ‘आरोग्य वर्धिनी’ केंद्राच्या नव्या इमारतीचे लोकार्पण लांजा-राजापूर-साखरपा विधानसभा मतदारसंघाचे आमदार किरण सामंत यांच्या हस्ते उत्साहात पार पडले. या कार्यक्रमाला ग्रामस्थ, स्थानिक पदाधिकारी, आरोग्य विभागाचे अधिकारी आणि मोठ्या संख्येने नागरिक उपस्थित होते.
या नव्या इमारतीमुळे देवाचेगोठणे व परिसरातील नागरिकांना आयुष पद्धतीने आरोग्य सेवा अधिक सुलभ आणि दर्जेदार पद्धतीने उपलब्ध होणार आहे. आयुर्वेद, योग, नैसर्गिक उपचार यांसारख्या पारंपरिक पद्धतींचा लाभ आता स्थानिक स्तरावर मिळणार असल्याने नागरिकांमध्ये समाधानाचे वातावरण आहे.
लोकार्पण सोहळ्यात बोलताना आमदार किरण सामंत यांनी सांगितले की, ग्रामीण भागातील आरोग्य सुविधा सक्षम करणे ही शासनाची प्राथमिकता आहे. आयुष आरोग्य केंद्रांच्या माध्यमातून नागरिकांना पर्यायी आणि परिणामकारक उपचार पद्धती उपलब्ध करून देण्याचा सरकारचा प्रयत्न आहे. या केंद्रामुळे परिसरातील लोकांना मोठा दिलासा मिळेल, असेही त्यांनी नमूद केले.
यावेळी आरोग्य विभागाच्या अधिकाऱ्यांनी केंद्रात उपलब्ध असलेल्या सुविधांची माहिती दिली. लवकरच येथे विविध आरोग्य तपासण्या, योग प्रशिक्षण शिबिरे आणि जनजागृती कार्यक्रम राबवले जाणार असल्याचे त्यांनी सांगितले.ग्रामस्थांनी या प्रकल्पाबद्दल समाधान व्यक्त करत आमदार किरण सामंत यांचे आभार मानले. या आरोग्य केंद्रामुळे गावाच्या आरोग्य व्यवस्थेत मोठी सुधारणा होईल, असा विश्वास नागरिकांनी व्यक्त केला.
यावेळी जिल्हा आरोग्य अधिकारी डॉक्टर अनिरुद्ध आठले, पंचायत समिती सभापती नंदनी कदम ,तालुका प्रमुख दीपक नागले, जिल्हा परिषद सदस्य कोमल नवाळे, पंचायत समिती सदस्य स्पृहा गुरव,पंचायत समिती सदस्य राजू गुरव,तालुका आरोग्य अधिकारी डॉ. बालाजी लोकरे ,डॉ. हर्षदा भिडे,डॉ.सायली तांबे,देवाचे गोठणे सरपंच ज्योती सोगम ,युवा सेना तालुकाप्रमुख सुनील गुरव, विनोद शेलार, प्रसाद गुरव ,श्रीकांत सोडिये ,सूर्यकांत सोडिये, किरण सोगम,काशिनाथ गुरव ,संजय नाटेकर, सर्व आरोग्य कर्मचारी देवाची गोठणेतील सर्व ग्रामस्थ पदाधिकारी मान्यवर मोठ्या संख्येने उपस्थित होते.
