खेड:आपल्या जिद्दीच्या आणि कठोर परिश्रमाच्या जोरावर खेडमधील कन्या कोमल उल्हास बुटाला हिने शैक्षणिक क्षेत्रात सुवर्णमय कामगिरी करत तालुक्याच्या शिरपेचात मानाचा तुरा रोवला आहे. डॉ. बाळासाहेब सावंत कोकण कृषी विद्यापीठ, दापोली येथे संपन्न झालेल्या ४४ व्या पदवीदान समारंभात तिने एम.एस्सी. (वनशास्त्र) या विषयात विद्यापीठात प्रथम येण्याचा बहुमान मिळवत सुवर्णपदक पटकावले. दापोली येथील वनशास्त्र महाविद्यालयाची विद्यार्थिनी असलेल्या कोमलने आपल्या पदव्युत्तर अभ्यासक्रमात सातत्यपूर्ण आणि उत्कृष्ट कामगिरी बजावली असून, तिच्या या यशाने संपूर्ण खेड तालुक्याचे नाव सुवर्ण अक्षरात कोरले गेले आहे.
खेड येथील रहिवासी उल्हास बुटाला यांची कन्या असलेल्या कोमलने अत्यंत चिकाटीने वनशास्त्र विषयात आपले संशोधन आणि अभ्यास पूर्ण केला. तिच्या या उत्तुंग यशाबद्दल दापोली विद्यापीठाचे कुलगुरू, प्राध्यापक आणि शिक्षणतज्ज्ञांकडून तिचे विशेष कौतुक करण्यात येत आहे. ग्रामीण भागातील विद्यार्थ्यांनी योग्य दिशा आणि मेहनत घेतल्यास ते विद्यापीठ स्तरावरही अव्वल स्थान प्राप्त करू शकतात, हेच कोमलने आपल्या यशामधून सिद्ध करून दाखवले आहे.
खेड शहराच्या वैभवात भर घालणाऱ्या या यशाबद्दल राजकीय, सामाजिक आणि शैक्षणिक क्षेत्रातील मान्यवरांकडून कोमलवर अभिनंदनाचा वर्षाव होत आहे. तिने मिळवलेले हे यश आगामी पिढीतील विद्यार्थ्यांसाठी, विशेषतः ग्रामीण भागातील मुलींसाठी अत्यंत प्रेरणादायी ठरणार असल्याची भावना नागरिकांकडून व्यक्त केली जात आहे. पदवीदान समारंभातील या सुवर्ण पदकामुळे कोमलच्या शैक्षणिक प्रवासातील एका महत्त्वाच्या टप्प्यावर मोहर उमटली असून, सर्व स्तरांतून तिचे कौतुक केले जात आहे.
