मुंबई: उन्हाळी सुट्ट्यांनिमित्त कोकणात जाणाऱ्या प्रवाशांची होणारी प्रचंड गर्दी लक्षात घेऊन मध्य रेल्वेने लोकमान्य टिळक टर्मिनस ते मडगाव दरम्यान दोन अतिरिक्त उन्हाळी विशेष गाड्या चालवण्याचा महत्त्वपूर्ण निर्णय घेतला असून यामुळे कोकणवासीयांना मोठा दिलासा मिळाला आहे.
या विशेष नियोजनानुसार, गाडी क्रमांक ०१००३ ही विशेष ट्रेन ४ मे २०२६ रोजी सकाळी ८.२० वाजता लोकमान्य टिळक टर्मिनस येथून सुटेल आणि त्याच दिवशी रात्री १०.४० वाजता मडगाव येथे पोहोचेल. तसेच परतीच्या प्रवासासाठी गाडी क्रमांक ०१००४ ही ट्रेन ३ मे २०२६ रोजी मडगाव येथून सायंकाळी ४.३० वाजता सुटून दुसऱ्या दिवशी सकाळी ६.२० वाजता मुंबईत दाखल होईल. या गाड्यांना ठाणे, पनवेल, रोहा, चिपळूण, रत्नागिरी, कणकवली आणि सावंतवाडी रोड यांसह कोकण रेल्वे मार्गावरील महत्त्वाच्या स्थानकांवर थांबे देण्यात आले आहेत.
विशेष म्हणजे गाडी क्रमांक ०१००३ साठीचे आरक्षण २ मे २०२६ पासून सर्व संगणकीकृत केंद्रांवर आणि आयआरसीटीसीच्या संकेतस्थळावर खुले करण्यात आले आहे. प्रवाशांना अनारक्षित तिकिटे यूटीएस प्रणालीद्वारे उपलब्ध होतील, तर अधिक माहितीसाठी रेल्वे प्रशासनाने प्रवाशांना अधिकृत संकेतस्थळाला भेट देण्याचे आवाहन केले आहे. सुट्ट्यांच्या हंगामात नियमित गाड्यांचे आरक्षण महिनाभर आधीच फुल्ल झाल्याने या अतिरिक्त गाड्यांचा प्रवाशांना मोठ्या प्रमाणावर लाभ होणार आहे.
