वीर: कोकण रेल्वे मार्गावरून प्रवास करणाऱ्या एका प्रवाशासाठी रेल्वे सुरक्षा दलाचे (आरपीएफ) जवान देवदूत ठरले आहेत. २३ एप्रिल २०२६ रोजी गाडी संख्या १२६२६ मधून प्रवास करणाऱ्या एका प्रवाशाचा मोबाईल वीर स्थानकाजवळ पडला होता. या घटनेची माहिती मिळताच कोलाड आरपीएफ चौकीच्या अंतर्गत वीर येथे कार्यरत असलेले होमगार्ड श्री. प्रमोद सत्ते आणि श्री. राजू मोहिते यांनी अत्यंत तत्परता दाखवत शोधमोहीम राबवली.
घटनेचे गांभीर्य ओळखून या दोन्ही जवानांनी रेल्वे रुळांच्या परिसरात शोध घेऊन प्रवाशाचा महागडा मोबाईल यशस्वीरित्या शोधून काढला. त्यानंतर कायदेशीर प्रक्रिया पूर्ण करून तो मोबाईल मूळ मालकाकडे सुपूर्द करण्यात आला. आपला हरवलेला मोबाईल सुखरूप परत मिळाल्याने प्रवाशाने जवानांचे आभार मानले आहेत.
या जवानांच्या प्रामाणिकपणाची आणि शिस्तबद्ध कामगिरीची दखल कोकण रेल्वेचे महानिरीक्षक (IG/RPF/KRCL) यांनी घेतली असून, त्यांनी सत्ते आणि मोहिते यांचे विशेष कौतुक केले आहे. रेल्वे सुरक्षा दलाच्या ‘सदर सेवा’ या ब्रीदवाक्यानुसार प्रवाशांच्या सुरक्षेसाठी आणि त्यांच्या साहित्याच्या रक्षणासाठी तत्पर असल्याचा प्रत्यय या निमित्ताने पुन्हा एकदा आला आहे. महाराष्ट्र पोलीस मुख्यालय, मुंबई आणि लोहमार्ग पोलीस (GRP) यांच्या समन्वयाने प्रवाशांच्या सुविधेसाठी अशा प्रकारे सतर्क राहण्याचे आवाहन प्रशासनाकडून करण्यात आले आहे.
