चिपळूण: मुंबई-गोवा राष्ट्रीय महामार्गावर तालुक्यातील वालोपे येथे काल, रविवारी रात्री एक भीषण अपघात घडला. एका भरधाव टँकरने मोटारसायकलला मागून जोरदार धडक दिल्याने अडीच वर्षीय चिमुकलीचा जागीच दुर्दैवी मृत्यू झाला, तर तिचे आई-वडील गंभीर जखमी झाले आहेत. या घटनेनंतर संतप्त झालेल्या स्थानिक ग्रामस्थांनी महामार्गावर उतरून तब्बल दोन तास रास्ता रोको आंदोलन केले. यामुळे महामार्गाच्या दोन्ही बाजूंना ५ ते ६ किलोमीटरपर्यंत वाहनांच्या लांबच लांब रांगा लागून वाहतुकीची प्रचंड कोंडी झाली होती.
मिळालेल्या माहितीनुसार, २४ मे रोजी रात्री १० ते १०:३० वाजण्याच्या सुमारास होमगार्ड कर्मचारी कुणाल आग्रे हे आपल्या पत्नी आणि मुलीसह प्रवास करत होते. वालोपे परिसरात आले असता, पाठीमागून येणाऱ्या एका अनियंत्रित आणि भरधाव टँकरने त्यांच्या वाहनाला जोरदार धडक दिली. ही धडक इतकी भीषण होती की वाहनाचा चक्काचूर झाला. यामध्ये गंभीर दुखापत झाल्याने त्यांच्या चिमुकल्या मुलीचा जागीच प्राण गेला. तसेच कुणाल आग्रे आणि त्यांची पत्नी गंभीर जखमी झाले असून, त्यांना तात्काळ उपचारासाठी जवळच्या रुग्णालयात दाखल करण्यात आले आहे. त्यांच्यावर सध्या उपचार सुरू आहेत.
या अपघाताचे वृत्त वाऱ्यासारखे पसरताच परिसरातील नागरिक आणि ग्रामस्थ मोठ्या संख्येने घटनास्थळी जमा झाले. महामार्गावर वारंवार होणारे अपघात, वाहनांचा बेफाम वेग आणि प्रशासनाकडून सुरक्षेच्या उपाययोजनांकडे होणारे दुर्लक्ष याबद्दल नागरिकांमध्ये तीव्र संताप व्यक्त होत होता. याच संतापातून ग्रामस्थांनी महामार्गाच्या मध्यभागी ठिय्या मांडत ‘रास्ता रोको’ सुरू केला. यामुळे मुंबई-गोवा महामार्गावरील वाहतूक पूर्णपणे ठप्प झाली. रात्रीच्या वेळी अचानक लागलेल्या या वाहतूक कोंडीमुळे शेकडो प्रवासी आणि वाहनचालक रस्त्यावरच अडकून पडले.
घटनेची गांभीर्य ओळखून चिपळूण पोलीस, महामार्ग पोलीस आणि प्रशासकीय अधिकारी तात्काळ फौजफाट्यासह घटनास्थळी दाखल झाले. पोलिसांनी संतप्त ग्रामस्थांशी चर्चा करून, दोषींवर कडक कारवाई करण्याचे आणि वाहतूक सुरक्षेचे उपाय योजण्याचे आश्वासन दिले. पोलिसांच्या यशस्वी मध्यस्थीनंतर आणि समजुतीनंतर ग्रामस्थांनी आंदोलन मागे घेतले, ज्यानंतर पोलिसांनी वाहतूक हळूहळू पूर्ववत केली. याप्रकरणी अपघातग्रस्त टँकर चालकाविरोधात गुन्हा दाखल करण्याची प्रक्रिया सुरू असून चिपळूण पोलीस पुढील तपास करत आहेत. या हृदयद्रावक घटनेमुळे संपूर्ण चिपळूण परिसरात तीव्र हळहळ आणि शोककळा पसरली आहे.
