मंडणगड: निसर्गरम्य कोकणच्या पर्यावरणाला अधिक समृद्ध करण्यासाठी मंडणगड तालुक्यात एक महत्त्वाकांक्षी वृक्षलागवड प्रकल्पाचा शुभारंभ करण्यात आला आहे. महसूल विभाग मंडणगड आणि पुणे येथील व्हीबीपी ग्रुप ऑफ कंपनीज यांच्या संयुक्त विद्यमाने वाकवली गावाच्या हद्दीत ५१३ एकर क्षेत्रावर ३ लाख वृक्षांची लागवड करण्याचा हा अभिनव उपक्रम सुरू झाला आहे.
व्हीबीपी ग्रुपच्या सीएसआर (कॉर्पोरेट सोशल रिस्पॉन्सिबिलिटी) उपक्रमांतर्गत हा प्रकल्प महसूल विभागाच्या मार्गदर्शनाखाली राबवला जात आहे. प्रकल्पाच्या पहिल्याच दिवशी १०७० झाडांची लागवड करण्यात आली. पावसाळ्यामध्येही ही मोहीम अविरत सुरू राहणार आहे.
यावेळी प्रांताधिकारी विजयकुमार सूर्यवंशी यांनी व्हीबीपी ग्रुपच्या पर्यावरणपूरक कार्याचे कौतुक करत, “महसूल विभागाच्यावतीने या उपक्रमासाठी सर्वतोपरी सहकार्य दिले जाईल. या प्रकल्पाची दखल राज्य आणि राष्ट्रीय पातळीवर घेतली जाईल, यासाठी आम्ही प्रयत्नशील राहू,” असे सांगितले. तहसीलदार अक्षय ढाकणे यांनीही या प्रकल्पाचे कौतुक केले आणि महसूल विभागाच्या सर्व यंत्रणा या उपक्रमासाठी सज्ज असल्याचे स्पष्ट केले.
या शुभारंभप्रसंगी प्रांताधिकारी विजयकुमार सूर्यवंशी, मंडणगड तहसीलदार अक्षय ढाकणे, वनविभाग अधिकारी तौफिक मुल्ला, वाकवली सरपंच गणेश पेंढारे, पोलिस पाटील मंगेश केंद्रे, शेनाळे पोलिस पाटील अमित बैकर, तसेच व्हीबीपी ग्रुपचे संस्थापक व चेअरमन विकास बेंगडे पाटील आदी मान्यवर उपस्थित होते.
२०२० पासून तयारी, राष्ट्रीय स्तरावर कोकणचे नाव उज्वल करण्याचे ध्येय
या प्रकल्पाबद्दल बोलताना व्हीबीपी ग्रुपचे संस्थापक व अध्यक्ष विकास बेंगडे पाटील म्हणाले की, “२०२० पासून या वृक्ष लागवडीसाठी पायाभूत तयारी करण्यात आली आहे. जमिनीची पूर्वमशागत, पाण्याचे व्यवस्थापन आणि कुंपणाचे काम पूर्ण झाले आहे. यावर्षी अगरवूड, रक्तचंदन आणि महोगणी या तीन जातींच्या तीन लाख झाडांची लागवड करण्यात येणार आहे.” ते पुढे म्हणाले, “आमचा उद्देश केवळ झाडे लावणे हा नाही, तर लावलेल्या झाडांचे काटेकोरपणे संवर्धन आणि संगोपन करणे हा आहे. हा प्रकल्प राष्ट्रीय आणि आंतरराष्ट्रीय स्तरावर कोकणाचे नाव उज्ज्वल करेल, असा आम्हाला विश्वास आहे.”
हा प्रकल्प कोकणातील पर्यावरण संवर्धनासाठी एक महत्त्वाचे पाऊल असून, यामुळे परिसरातील जैवविविधतेलाही चालना मिळेल अशी अपेक्षा आहे.
