मुंबई: राज्य परिवहन महामंडळाची श्वेतपत्रिका आज जाहीर करण्यात येणार आहे. महामंडळाची आर्थिक स्थिती समजून घेण्यासाठी आणि नियोजनासाठी ही श्वेतपत्रिका महत्त्वाची ठरणार आहे.
परिवहन मंत्री तसेच महामंडळाचे अध्यक्ष प्रताप सरनाईक यांनी श्वेतपत्रिका काढण्याचे आदेश एप्रिल महिन्यात दिले होते. त्यानुसार आता ती जारी करण्यात येणार आहे.
एसटी महामंडळाचा सुमारे १० हजार कोटी संचित तोटा असल्याने महामंडळाला कर्मचाऱ्यांचे वेतन, वाहन खरेदी, टायर खरेदी, इंधन खरेदी, स्थानकांचे नूतनीकरण व इतर आस्थापना खर्चासाठी दररोज आर्थिक कसरत करावी लागते. कर्मचाऱ्यांची देणी, भविष्य निर्वाह निधीचे हप्ते, कामगार करारातील प्रलंबित देणी यासाठी महामंडळाला पैशाची गरज आहे. त्याचबरोबर महामंडळाला इंधन, वस्तु व सेवा पुरविणाऱ्या संस्थांची थकीत देणीही द्यायची आहेत. या सर्व घटकांचा विचार करून एसटी महामंडळाला सध्या किती उत्पन्न मिळते? किती खर्च येतो? तसेच किती देणी बाकी आहे या सर्वांचा लेखा-जोखा मांडण्यात यावा अशी मागणी महाराष्ट्र एसटी कर्मचारी काँग्रेसचे सरचिटणीस श्रीरंग बरगे यांनी केली होती.
आता श्वेतपत्रिका जाहीर करण्यात येत असल्याने महामंडळाच्या भविष्यातील नियोजनासाठी ती महत्त्वाची ठरणार आहे.
