रत्नागिरी: फिनोलेक्स इंडस्ट्रीज आणि मुकुल माधव फाउंडेशनच्या सहकार्याने रत्नागिरी तालुक्यातील नऊ गावांमधील २१०० विद्यार्थ्यांची आरोग्य तपासणी करण्यात आली.
गोळप , शिवार आंबेरे, उंबरे, कुरतडे, रनपार, धोपटवाडी, वायंगणी आणि पावस येथील शाळांमधील 2100 विद्यार्थ्यांसाठी मोफत आरोग्य तपासणी शिबिरांचे आयोजन करण्यात आले होते.
या शिबिरात विद्यार्थ्यांची नेत्र, दंत, कान, नाक, घसा आणि सर्वसाधारण तपासणी केली जात आहे. यासाठी पुण्यातून श्रीमती काशीबाई नवले हॉस्पिटल, एच व्ही देसाई आय हॉस्पिटल, सिंहगड डेंटल कॉलेज, सिम्बायोसिस युनिव्हर्सिटी हॉस्पिटल अँड रिसर्च सेंटर आणि देशपांडे दंत क्लिनिकमधील तज्ज्ञ डॉक्टर उपस्थित होते.
मुकुल माधव फाउंडेशनच्या संस्थापिका श्रीमती रितू छाब्रिया यांनी यावेळी सांगितले की, आपल्याकडे अनेक रुग्णालये असली तरी तांत्रिकदृष्ट्या प्रगत व शहरी पायाभूत सुविधांचा जास्तीत जास्त लोकांपर्यंत कसा पोहचवता येईल व आरोग्य सेवा आणि शिक्षण संस्थांमध्ये पायाभूत सुविधांमध्ये सुधारणा करण्यावर आमचे लक्ष आहे. याचाच एक भाग म्हणून याची सुरवात २०१० साली श्री लक्ष्मीकेशव स्कूलमधून झाली आणि फिनोलेक्स इंडस्ट्रीज व मुकुल माधव फाउंडेशन यांच्या वतीने दरवर्षी दोन वेळा शाळांमध्ये आरोग्य तपासणी शिबिरांचे आयोजन केले जाते.
शिबिरात रत्नागिरी आणि पुण्याच्या नामांकित रुग्णालयांमधील तज्ज्ञ डॉक्टर्सनी तपासणी केली. विद्यार्थ्यांना आवश्यक असल्यास, पुढील उपचार पुण्यातील विविध रुग्णालयांमध्ये मोफत आणि अल्प दरात केले जातात. तसेच उपचारांच्या योग्य पाठपुराव्यासाठी फिनोलेक्स इंडस्ट्रीज आणि मुकुल माधव फाउंडेशन सदैव तत्पर असतात.
या उपक्रमामुळे स्थानिक विद्यार्थ्यांना आरोग्य सेवा मिळविण्याची एक मोठी संधी उपलब्ध होत आहे. त्यामुळे त्यांचे शारीरिक आणि मानसिक आरोग्य सुधारण्यास मदत होईल. फिनोलेक्स आणि मुकुल माधव फाउंडेशनच्या या सामाजिक उपक्रमाचे कौतुक केले जात आहे.
