खेड: रत्नागिरी जिल्ह्यातील लोटे एमआयडीसी परिसरातील उद्योजकांना भेडसावणाऱ्या विविध समस्यांवर तोडगा काढण्यासाठी भाजपा आमदार प्रमोद जठार यांनी स्थानिक उद्योजक आणि कारखानदारांसोबत एक अत्यंत महत्त्वपूर्ण आढावा बैठक घेतली. औद्योगिक क्षेत्रातील अडचणी समजून घेत त्या मार्गी लावण्याचे आश्वासन यावेळी त्यांनी दिले.
गेल्या काही काळापासून लोटे एमआयडीसीमधील उद्योजक विविध समस्यांनी त्रस्त आहेत. या पार्श्वभूमीवर आयोजित या बैठकीत एमआयडीसी परिसरातील अपुऱ्या पायाभूत सुविधा, पाणीपुरवठ्याचा गंभीर प्रश्न आणि उद्योगांच्या विस्तार तसेच दैनंदिन कामकाजात येत असलेल्या प्रशासकीय अडचणी या विषयांवर सविस्तर चर्चा करण्यात आली. उद्योजकांनी मांडलेल्या समस्यांची दखल घेत आमदार प्रमोद जठार यांनी या समस्या लवकरात लवकर सोडवल्या जातील, अशी खात्री दिली. उद्योजकांशी संवाद साधताना त्यांनी ‘मीच तुमचा पालक आमदार आहे,’ अशा शब्दांत त्यांना आश्वस्त केले.
या बैठकीला भाजपा नेते तथा खेड नगर परिषदेचे माजी नगराध्यक्ष ॲड. वैभव खेडेकर, भाजपा उत्तर खेड तालुकाध्यक्ष ऋषिकेश मोरे, दक्षिण खेड तालुकाध्यक्ष विनोद चाळके, खेड शहराध्यक्ष भालचंद्र उर्फ नंदू साळवी, भाजपा युवा मोर्चाचे रत्नागिरी जिल्हा सरचिटणीस ॲड. मिलिंद उर्फ दादू नांदगावकर, उत्तर रत्नागिरी जिल्हा सरचिटणीस वसंत ताम्हणकर, स्वराज गांधी, ओवैस चौगुले, प्रदीप भोसले यांच्यासह मोठ्या संख्येने स्थानिक उद्योजक उपस्थित होते.
