रत्नागिरीतील नवीन बसस्थानक, पाली आणि माखजन बसस्थानक स्वच्छ सुंदर बसस्थानके
रत्नागिरी:हिंदुहृदयसम्राट बाळासाहेब ठाकरे स्वच्छ, सुंदर बसस्थानक अभियानांतर्गत महाराष्ट्रभर राबवण्यात आलेल्या त्रैमासिक सर्वेक्षणात रत्नागिरी जिल्ह्याने मुंबई प्रदेशात अग्रस्थान मिळवत आपल्या स्वच्छता आणि व्यवस्थापन क्षमतेचा ठसा उमटवला आहे. जानेवारी ते मार्च 2025 या कालावधीत करण्यात आलेल्या या सर्वेक्षणात जिल्ह्याने फक्त आपले नाव उजळले नाही, तर प्रवाशांना उत्तम सोयीसुविधा पुरवण्याची आपली बांधिलकीही अधोरेखित केली.
या अभियानांतर्गत बसस्थानकांची स्वच्छता, प्रशासन व्यवस्था आणि हरित उपक्रम या विविध निकषांवर आधारित गुणांकन करण्यात आले. रत्नागिरी जिल्ह्यातील तीन प्रमुख बसस्थानकांनी या सर्वेक्षणात उत्कृष्ट कामगिरी करत जिल्ह्याची मान उंचावली आहे.
‘अ’ वर्गात रत्नागिरी (नवीन) बसस्थानकाचा ऐतिहासिक प्रथम क्रमांक
‘अ’ वर्गवारीतील बसस्थानकांमध्ये रत्नागिरी (नवीन) बसस्थानकाने 89 गुण मिळवत सर्वोच्च स्थान मिळवले. स्वच्छतेसाठी 30 पैकी 29 गुण, व्यवस्थापनासाठी 50 पैकी 44 गुण आणि हरित उपक्रमासाठी 20 पैकी 16 गुण मिळवून या बसस्थानकाने आपली गुणवत्ता सिद्ध केली. या कामगिरीने रत्नागिरीने बोईसर (83 गुण) व कुडाळ (74 गुण) यांसारख्या बसस्थानकांना मागे टाकले आहे.
‘ब’ वर्गात पाली बसस्थानकाची उल्लेखनीय दुसरी कामगिरी
पाली (रत्नागिरी) बसस्थानकाने ‘ब’ वर्गवारीत 84 गुण मिळवत दुसरे स्थान पटकावले. स्वच्छतेसाठी 28, व्यवस्थापनासाठी 43 आणि हरित उपक्रमांसाठी 13 गुण मिळाले. मुंबईतील दादर बसस्थानकाने 85 गुण मिळवून पहिले स्थान घेतले, मात्र पालीने मुंबईतीलच एका दुसऱ्या बसस्थानकाला (81 गुण) मागे टाकले आहे.
‘क’ वर्गात माखजन बसस्थानकाची अभिमानास्पद उपस्थिती
‘क’ वर्गवारीत संगमेश्वर तालुक्यातील माखजन बसस्थानकाने 74 गुण मिळवून जिल्ह्याची शान वाढवली. यामध्ये स्वच्छतेसाठी 24, व्यवस्थापनासाठी 37 आणि हरित उपक्रमांसाठी 13 गुण देण्यात आले. मुंबईच्या परळ (89 गुण) आणि नालासोपारा (76 गुण) बसस्थानकांनंतर माखजनने तिसरे स्थान पटकावले.
‘रत्नागिरी पॅटर्न’ ठरणार राज्यासाठी प्रेरणा
या सर्वेक्षणातून जिल्ह्यातील बसस्थानकांची देखभाल, स्वच्छता आणि हरित उपाययोजनांबाबत केलेले प्रयत्न अधोरेखित झाले आहेत. प्रवाशांना स्वच्छ, सुंदर व आरोग्यदायी वातावरण देण्यासाठी स्थानिक प्रशासन आणि कर्मचाऱ्यांनी घेतलेले कष्ट निश्चितच कौतुकास्पद आहेत. या यशामुळे रत्नागिरीचा सार्वजनिक वाहतूक सेवेतील दर्जा अधिक वृद्धिंगत झाला आहे. भविष्यात “स्वच्छतेचा रत्नागिरी पॅटर्न” म्हणून जिल्हा ओळखला जाईल आणि इतर बसस्थानकांसाठीही मार्गदर्शक ठरेल, अशी अपेक्षा व्यक्त केली जात आहे.
