फसवणूक आणि शारीरिक शोषणाचा गंभीर आरोप; पीडित तरुणीची पोलिसांत तक्रार
चिपळूण: समाजात डॉक्टर या शब्दाला एक वेगळी प्रतिष्ठा आणि मान असतो; मात्र डॉ. नोमान इब्राहिम अत्तार (३६) याच्यासारख्या विकृत व्यक्तींच्या कारनाम्यांमुळे या पवित्र पेशालाच कलंक लागत आहे. लग्नाचे आमिष दाखवून एका तरुणीसोबत तब्बल दोन वर्षे शारीरिक संबंध ठेवून तिची फसवणूक केल्याप्रकरणी डॉ. नोमान अत्तार याच्या विरोधात रबाळे एमआयडीसी पोलिस ठाण्यात १७ जून २०२५ रोजी गुन्हा दाखल करण्यात आला आहे. पीडित प्रियंका (३२) हिने दिलेल्या तक्रारीनुसार, डॉ. अत्तारने तिला विवाहाचे खोटे आश्वासन दिले, तिच्याशी शारीरिक संबंध प्रस्थापित केले, गर्भपातासाठी भाग पाडले आणि नंतर दुसऱ्या महिलेशी लग्न करून तिची फसवणूक केली.
डॉ. अत्तार आणि प्रियंका यांची ओळख जुलै २०२३ मध्ये एका ऑनलाइन सोशल मीडिया ॲपद्वारे झाली होती. त्यावेळी डॉ. अत्तार नवी मुंबईतील कोकिळाबेन हॉस्पिटलमध्ये कार्यरत होता. ही ओळख लवकरच प्रेमात बदलली आणि लग्नाचे खोटे आश्वासन देत १५ व १६ जुलै रोजी महापे एमआयडीसीमधील एका हॉटेलमध्ये जबरदस्तीने शारीरिक संबंध ठेवण्यात आले, असा आरोप प्रियंकाने आपल्या तक्रारीत केला आहे. यानंतरही डोंबिवली आणि तळोजा येथील विविध ठिकाणी त्यांच्यात शारीरिक संबंध सुरूच राहिले.
ऑक्टोबर २०२३ मध्ये प्रियंका गर्भवती राहिल्यानंतर तिने डॉ. अत्तारकडे लग्नाचा विषय काढला. त्यावेळी डॉ. अत्तारने वेळ मागून घेतला आणि प्रियंकाला औषध देऊन गर्भपातासाठी भाग पाडले, असे तिचे म्हणणे आहे. या घटनेमुळे मानसिकदृष्ट्या पूर्णपणे खचलेल्या अवस्थेतही प्रियंका डॉ. अत्तारसोबत संबंधात होती. डॉ. अत्तार तिच्या घरी थांबत असे आणि दरमहा खर्चासाठी पैसेही देत असे, असेही प्रियंकाने सांगितले आहे.
डिसेंबर २०२४ मध्ये डॉ. अत्तारने चिपळूण येथे स्वतःची ओपीडी (बाह्यरुग्ण विभाग) सुरू केली. प्रियंकाने त्याला सोशल मीडिया मार्केटिंगमध्येही मदत केली. मात्र, डॉ. अत्तारचा संबंधात केवळ शारीरिक गरजा भागवण्याचा हेतू होता, असा गंभीर आरोप प्रियंकाने केला आहे. प्रियंकाचा मानसिक ताण वाढत गेला आणि २६ मे २०२४ रोजी तिने आत्महत्येचा प्रयत्नही केला होता. त्यांच्यातील शेवटचे शारीरिक संबंध २४ फेब्रुवारी २०२५ रोजी झाले. ४ एप्रिल रोजी चिपळूण येथे आयोजित एका हेल्थ कॅम्पमध्ये डॉ. अत्तार एका मुस्लिम महिलेसोबत दिसले. पुढे प्रियंकाने दुबईमध्ये असताना या प्रकरणाचा तपास केला असता, डॉ. अत्तारने त्या महिलेसोबत लग्न केल्याचे उघड झाले आणि आपली फसवणूक झाल्याची जाणीव तिला झाली.
या प्रकरणी भारतीय न्याय संहिता, २०२३ अंतर्गत कलम ६९ (फसवणूक) आणि ८९ (शारीरिक शोषण) अन्वये डॉ. अत्तार विरोधात गुन्हा दाखल करण्यात आला आहे. पुढील तपास रबाळे एमआयडीसी पोलिस ठाण्याचे उपनिरीक्षक राहुल सत्यवान गरड करत आहेत. डॉक्टरी पेशाला काळीमा फासणाऱ्या या घटनेने समाजात संतापाची लाट उसळली आहे. नागरिकांनी अशा आमिषांना बळी न पडता सावध राहावे, असे आवाहन पोलिसांनी केले आहे.
