अवैध दारू धंद्यांविरोधात प्रवीण जाधव आक्रमक

थेट तुकाराम मुंढे यांना पत्र; चिपळुणातील अवैध दारू व अमली पदार्थ विक्रीवर कठोर कारवाईची मागणी

चिपळूण : तालुक्यात सुरू असल्याचा आरोप करण्यात येत असलेल्या अवैध गावठी हातभट्टी दारू, गोवा बनावटीची दारू, गांजा व इतर अमली पदार्थांच्या विक्रीविरोधात सामाजिक कार्यकर्ते प्रवीण राजाराम जाधव यांनी आक्रमक भूमिका घेतली आहे. या प्रकरणी त्यांनी भारतीय प्रशासकीय सेवेतील अधिकारी तुकाराम मुंढे यांना पत्र पाठवून चिपळूण तालुक्यातील अवैध धंद्यांची स्वतंत्र चौकशी करून दोषींवर कठोर कारवाई करण्याची मागणी केली आहे.

अवैध दारूविक्रीच्या तक्रारींकडे लक्ष देण्याची मागणी

चिपळूण तालुक्यातील विविध गावांमध्ये अवैध गावठी हातभट्टी दारूची निर्मिती व विक्री, गोवा बनावटीच्या दारूची बेकायदेशीर विक्री तसेच गांजा व इतर अमली पदार्थांची विक्री सुरू असल्याच्या तक्रारी स्थानिक पातळीवरून सातत्याने प्राप्त होत असल्याचा दावा जाधव यांनी पत्रात केला आहे.

दारूच्या व्यसनामुळे कौटुंबिक वाद वाढत असल्याचा दावा

दारूच्या व्यसनामुळे अनेक कुटुंबांमध्ये कौटुंबिक वाद, मारहाण, आर्थिक शोषण तसेच महिलांवरील अत्याचाराच्या घटना घडत असल्याच्या तक्रारी नागरिकांकडून होत असल्याचे जाधव यांनी म्हटले आहे. त्यामुळे हा प्रश्न केवळ अवैध दारूविक्रीपुरता मर्यादित नसून युवकांचे भविष्य, महिलांची सुरक्षितता आणि सामाजिक सुरक्षेशी संबंधित असल्याचे त्यांनी पत्रात नमूद केले आहे.

किरकोळ विक्रेत्यांऐवजी मूळ सूत्रधारांवर कारवाई करा

संबंधित विभागांकडून वेळोवेळी कारवाई केली जात असल्याचे सांगितले जाते; मात्र काही ठिकाणी कारवाईनंतर पुन्हा हे धंदे सुरू होत असल्याचा आरोप करण्यात आला आहे. त्यामुळे केवळ किरकोळ विक्रेते किंवा छोट्या व्यावसायिकांवर कारवाई न करता मोठ्या हातभट्टी चालकांवर, पुरवठादारांवर तसेच संपूर्ण अवैध विक्री साखळीच्या मूळ सूत्रधारांवर कारवाई करावी, अशी मागणी जाधव यांनी केली आहे.

अधिकारी-कर्मचाऱ्यांच्या भूमिकेचीही चौकशी करा

अवैध धंद्यांना संबंधित अधिकारी किंवा कर्मचाऱ्यांकडून संरक्षण, दुर्लक्ष अथवा संगनमत होत आहे का, याची स्वतंत्र चौकशी करण्याची मागणीही करण्यात आली आहे. चौकशीत कोणत्याही अधिकारी किंवा कर्मचाऱ्याचा सहभाग अथवा कर्तव्यात कसूर आढळल्यास त्यांच्यावरही नियमानुसार कठोर कारवाई करावी, असे जाधव यांनी पत्रात म्हटले आहे.

स्वतंत्र पथकाद्वारे गुप्त तपासणीची मागणी

केवळ कागदोपत्री अहवालावर विश्वास न ठेवता स्वतंत्र पथकाच्या माध्यमातून प्रत्यक्ष गुप्त तपासणी करण्यात यावी, अशी मागणी करण्यात आली आहे. शाळा, महाविद्यालये आणि युवकांची वर्दळ असलेल्या परिसरात विशेष तपासणी मोहीम राबवावी, असेही पत्रात नमूद करण्यात आले आहे.

नागरिकांच्या तक्रारींसाठी गोपनीय तक्रार यंत्रणा उपलब्ध करून देणे, संबंधित विभागांनी आतापर्यंत केलेल्या कारवाईचा अहवाल मागवून त्याची स्वतंत्र पडताळणी करणे तसेच अवैध धंद्यांवर नियमित देखरेख ठेवण्याच्या सूचना प्रशासनाला देण्यात याव्यात, अशा विविध मागण्या प्रवीण जाधव यांनी पत्राद्वारे केल्या आहेत.