सावर्डेतील धोकादायक खड्ड्याची अखेर कायमस्वरूपी दुरुस्ती

सावर्डे / विनायक सावंत: मुंबई-गोवा राष्ट्रीय महामार्ग क्रमांक ६६ वरील चिपळूण तालुक्यातील सावर्डे येथील आरती स्वीटसमोरील धोकादायक खड्ड्याची अखेर संपूर्ण दुरुस्ती करण्यात आली आहे. वारंवार तात्पुरती डागडुजी करूनही पुन्हा उखडणाऱ्या या खड्ड्यामुळे वाहनचालक आणि प्रवाशांना मोठ्या त्रासाला सामोरे जावे लागत होते.

या ठिकाणी यापूर्वी अनेकदा खडी, डांबर आणि काँक्रीट टाकून खड्डा बुजविण्याचा प्रयत्न करण्यात आला. मात्र काही दिवसांतच दुरुस्ती केलेला भाग पुन्हा खराब होत असल्याने नागरिकांमध्ये नाराजी होती. विशेषतः पावसाळ्यात खड्ड्यात पाणी साचत असल्याने त्याची खोली वाहनचालकांच्या लक्षात येत नव्हती. त्यामुळे दुचाकीस्वारांसह अन्य वाहनांना अपघाताचा धोका निर्माण झाला होता.

या समस्येबाबत स्थानिक नागरिक, सामाजिक कार्यकर्ते, प्रवासी तसेच स्थानिक लोकप्रतिनिधींनी संबंधित यंत्रणेकडे वारंवार पाठपुरावा केला. माध्यमांनीही या धोकादायक खड्ड्याचा प्रश्न सातत्याने मांडत संबंधित यंत्रणेचे लक्ष वेधले होते.

अखेर या समस्येची दखल घेत संबंधित यंत्रणेने केवळ वरवर खड्डा बुजविण्याऐवजी खराब झालेला संपूर्ण रस्ता खोदून त्या ठिकाणी नव्याने काँक्रीट पॅच टाकण्याचे काम हाती घेतले. दुरुस्तीच्या कामासाठी काही काळ वाहतूक एकेरी करण्यात आली होती. त्यामुळे वाहनचालकांना झालेल्या तसदीबद्दल संबंधित यंत्रणेकडून दिलगिरीही व्यक्त करण्यात आली.

संपूर्ण खराब झालेला भाग काढून नव्याने मजबूत पॅच तयार करण्यात आल्याने भविष्यात या ठिकाणी वारंवार खड्डा पडण्याची समस्या कमी होईल, अशी अपेक्षा व्यक्त होत आहे. मात्र, महामार्गावरील इतर धोकादायक ठिकाणांचीही तातडीने पाहणी करून त्यांची दर्जेदार आणि कायमस्वरूपी दुरुस्ती करावी, अशी मागणी स्थानिक नागरिकांनी केली आहे.

तात्पुरत्या डागडुजीऐवजी आता कायमस्वरूपी उपाययोजना झाल्याने सावर्डेतील वाहनचालकांना काहीसा दिलासा मिळाला आहे. मात्र, महामार्गावरील इतर खड्ड्यांबाबतही अशीच तत्परता दाखविण्याची गरज असल्याचे नागरिकांचे म्हणणे आहे.