लांजा शहरातील खड्ड्यांबाबत शिवसेना ठाकरे गटाककडून अनोखे आंदोलन; खड्ड्यांमध्ये थेट चिखल नांगरणी

शासनाच्या कारभाराचे वाभाडे काढले

लांजा/अरबाज नेवरेकर : लांजा शहरातील खड्डेमय रस्त्यांच्या प्रश्नाकडे प्रशासनाचे लक्ष वेधण्यासाठी शिवसेना (उद्धव बाळासाहेब ठाकरे) युवा सेनेच्या वतीने स्वातंत्र्यदिनाच्या पार्श्वभूमीवर अनोखे आंदोलन करण्यात आले. शहरातील रस्त्यांवरील खड्ड्यांमध्ये थेट चिखल नांगरणी करून प्रशासनाच्या कारभाराचे लक्ष वेधण्यात आले.

लांजा शहरातील प्रमुख रस्त्यांवर ठिकठिकाणी मोठमोठे खड्डे पडले आहेत. पावसामुळे या खड्ड्यांमध्ये पाणी आणि चिखल साचत असल्याने वाहनचालक, पादचारी तसेच नागरिकांना मोठ्या त्रासाला सामोरे जावे लागत आहे. वारंवार मागणी करूनही रस्त्यांची दुरुस्ती होत नसल्याने अखेर प्रशासनाचे लक्ष वेधण्यासाठी हे अनोखे आंदोलन करण्यात आले.

बसवेश्वर चौक ते तहसीलदार कार्यालय या मार्गावर पडलेल्या खड्ड्यांमध्ये चिखल नांगरणी स्पर्धा घेण्यात आली. बैलजोड्यांच्या माध्यमातून चक्क रस्त्यावरील खड्ड्यांमध्ये नांगरणी करण्यात आली. रस्त्यांची झालेली दुरवस्था आणि नागरिकांना दररोज सहन करावा लागणारा त्रास या आंदोलनाच्या माध्यमातून प्रभावीपणे अधोरेखित करण्यात आला.

लांजा तालुक्याच्या इतिहासात प्रथमच अशा प्रकारची चिखल नांगरणी स्पर्धा घेण्यात आल्याचा दावा आंदोलनकर्त्यांनी केला. या अनोख्या आंदोलनाला नागरिकांचेही लक्ष वेधले गेले. स्पर्धेत सहभागी झालेल्या बैलजोड्यांच्या शेतकऱ्यांना बक्षिसे देऊन सन्मानित करण्यात आले.

उद्धव बाळासाहेब ठाकरे पक्षाचे लांजा तालुका युवा अधिकारी अभिजित राजेशिर्के यांच्या मार्गदर्शनाखाली हे आंदोलन करण्यात आले. यावेळी जिल्हाप्रमुख दत्ता कदम, उपजिल्हाप्रमुख रविंद्र डोळस, अल्लाउद्दीन नेवरेकर, मोहन तोंडकर, लक्ष्मण मोर्ये, राजू सुर्वे, बाबू गुरव, बाबा धावणे, चंद्रकांत शिंदे, मांडवकर यांच्यासह शिवसैनिक मोठ्या संख्येने उपस्थित होते.

लांजा शहरातील रस्त्यांची तातडीने दुरुस्ती करून नागरिकांना दिलासा द्यावा, अशी मागणी आंदोलनकर्त्यांनी केली. प्रशासनाने रस्त्यांच्या दुरवस्थेकडे गांभीर्याने पाहून तातडीने कार्यवाही न केल्यास नागरिकांचा त्रास आणखी वाढण्याची शक्यता आहे. अनोख्या पद्धतीने करण्यात आलेल्या या आंदोलनामुळे लांजा शहरातील खड्डेमय रस्त्यांचा प्रश्न पुन्हा एकदा ऐरणीवर आला आहे.