रत्नागिरी: महाराष्ट्र पर्यटन विभागाकडून आंतरराष्ट्रीय, राष्ट्रीय तसेच राज्यस्तरावरील पर्यटन प्रचार कार्यक्रमांना आर्थिक सहाय्य (प्रायोजकत्व) दिले जाणार आहे. खासगी संस्था, संघटना, स्वयंसेवी संस्था, सहकारी संस्था आणि कार्यक्रम व्यवस्थापन करणाऱ्या कंपन्यांना याचा लाभ घेता येईल.
राज्यातील पर्यटन वाढवण्यासाठी शासनाने हे पाऊल उचलले आहे. विशेषतः नामांकित टीव्ही वाहिन्या आणि मोठ्या संख्येने फॉलोअर्स असलेल्या सोशल मीडिया एन्फ्लुएन्सर्सना त्यांच्या पर्यटन-विषयक साहित्यासाठी (कंटेंट) त्यांच्या फॉलोअर्सच्या संख्येनुसार प्रायोजकत्व दिले जाईल.
या धोरणामुळे महाराष्ट्राची समृद्ध संस्कृती, नैसर्गिक सौंदर्य, ऐतिहासिक वारसा आणि धार्मिक स्थळांची ओळख जगाला करून देण्यास मदत होईल, अशी अपेक्षा आहे.
या योजनेचा लाभ घेण्यासाठी इच्छुकांनी आपले प्रस्ताव महाराष्ट्र पर्यटन विभागाच्या http://www.maharashtratourism.gov.in या संकेतस्थळावर ऑनलाइन पद्धतीने सादर करणे बंधनकारक आहे. महत्त्वाचे म्हणजे, कोणताही प्रस्ताव कार्यक्रमाच्या किमान ३० दिवस आधी सादर करणे आवश्यक आहे.
यापूर्वी पर्यटन विभाग विविध कार्यक्रमांचे आयोजन करत असे, पण आता ३० एप्रिल २०२५ च्या शासन निर्णयानुसार सोशल मीडिया आणि ओटीटी (OTT) प्लॅटफॉर्म्ससारख्या नवीन तंत्रज्ञानाचा वापर करून पर्यटन प्रचार करण्यास प्रोत्साहन दिले जात आहे. यामुळे महाराष्ट्रातील पर्यटनाला अधिक चालना मिळेल, असा विश्वास व्यक्त केला जात आहे.
