रत्नागिरी : सार्वजनिक रस्ते, महामार्ग, बसस्थानक परिसर तसेच महत्त्वाच्या मार्गांवर वाहतुकीस अडथळा निर्माण होईल अशा पद्धतीने वाहने उभी करणाऱ्यांविरोधात रत्नागिरी जिल्हा पोलिसांनी कारवाईचा धडाका लावला आहे. जिल्ह्यातील विविध पोलिस ठाण्यांच्या हद्दीत सार्वजनिक रस्त्यावर वाहतुकीस अडथळा निर्माण करणाऱ्या वाहनचालकांविरुद्ध एकूण ४३ गुन्हे दाखल करण्यात आले आहेत. या कारवाईमुळे रस्त्यावर बेशिस्तपणे वाहने उभी करणाऱ्यांना चांगलाच दणका बसला असून, वाहतुकीची शिस्त कायम ठेवण्याचा पोलिसांचा प्रयत्न सुरू असल्याचे स्पष्ट झाले आहे.
पोलिसांच्या नोंदीनुसार, खेड, चिपळूण, लांजा, राजापूर, रत्नागिरी, सावर्डे, गुहागर, देवरुख, दापोली, संगमेश्वर तसेच कुंभार्ली घाट परिसरात ही कारवाई करण्यात आली. सार्वजनिक रस्त्यावर दुचाकीपासून चारचाकी, रिक्षा, मालवाहू वाहने, ट्रक, डंपर, ट्रेलर आणि बसपर्यंत विविध प्रकारची वाहने वाहतुकीला अडथळा निर्माण होईल अशा पद्धतीने उभी केल्याचे पोलिसांच्या कारवाईत निदर्शनास आले.
खेड-दापोली मार्गावर दुचाकी रस्त्यावर उभी केल्याप्रकरणी अमोल अशोक शेलार याच्याविरुद्ध गुन्हा दाखल करण्यात आला. त्याचबरोबर भरणे ब्रिजखाली टाटा टियागो, सुझुकी ईको यांसह अन्य वाहने सार्वजनिक रस्त्यावर उभी करून वाहतुकीस अडथळा निर्माण केल्याप्रकरणी तुषार नानाजी कदम, सुहास बाबाजी जाधव, अमर शंकर मोरे आणि नितेश धोंडू हंबीर यांच्याविरुद्ध स्वतंत्र गुन्हे दाखल करण्यात आले. खेड रेल्वे स्थानक मार्गावर ईको वाहन उभे करणाऱ्या बशीर अहमद आदम चौगले तसेच तिनबत्ती नाका परिसरात वाहने उभी करणाऱ्या सौरभ दत्ताराम चिंचघरे आणि मैनुद्दीन अब्दुल गफूर तांबे यांच्यावरही कारवाई करण्यात आली.
चिपळूण परिसरातही सार्वजनिक रस्त्यावर वाहने उभी करण्याच्या प्रकारांवर पोलिसांनी कारवाई केली. पॉवर हाऊस ते चिंचनाका मार्गावरील किंग सुपर बाजारासमोर मिडी बस उभी केल्याप्रकरणी नितीश विष्णू बोबले याच्याविरुद्ध गुन्हा दाखल करण्यात आला. मुंबई-गोवा महामार्गावरील सावर्डे परिसरात ट्रक रस्त्यावर उभा करणाऱ्या संदीप अनंत पावसकर याच्यावरही कारवाई करण्यात आली. कुंभार्ली घाट परिसरात वाहतुकीला अडथळा निर्माण करणारे ट्रेलर आणि ट्रक रस्त्यावर उभे केल्याप्रकरणी गुरुसाहेब बलवीर सिंग, चरणजीत संतोष सिंग आणि सैद अहमद मोहम्मद शमीम या चालकांविरुद्ध गुन्हे दाखल करण्यात आले.
लांजा बाजारपेठ आणि मुंबई-गोवा महामार्ग परिसरातही बेशिस्त पार्किंगविरोधात पोलिसांनी कारवाई केली. बाजारपेठेत पॅशन प्रो मोटारसायकल उभी करणाऱ्या अमोल राजाराम गुरव, वॅगनर कार उभी करणाऱ्या आदिल रमेश गोसावी, छोटा हत्ती वाहन उभे करणाऱ्या राजेश रमेश भाटवडेकर, स्प्लेंडर प्लस रस्त्यावर उभी करणाऱ्या पवनकुमार भिमू राठोड आणि सफारी वाहन उभे करणाऱ्या महेश मधुकर मोहिते यांच्यावर गुन्हे दाखल झाले.
More Read
राजापूर शहरातही सार्वजनिक रस्त्यांवरील अडथळ्यांविरोधात कारवाई करण्यात आली. युनियन बँकेसमोर ओमनी वाहन उभे करणाऱ्या आनंद नामदेव कोळेकर याच्याविरुद्ध, तर ताबरेज चौकातील गणेशनगर बसथांब्याजवळ मालवाहू वाहने उभी करणाऱ्या प्रविण महादेव नाईक, नजाक सफरराज हुना आणि सरुद्दीन फकीर अहमद हुना यांच्याविरुद्ध गुन्हे दाखल करण्यात आले. राजापूर एसटी डेपोजवळ विनानंबर अॅक्सेस स्कूटर भरधाव वेगाने चालविल्याप्रकरणी सुजित रमेश शिंदे याच्यावरही भारतीय न्याय संहितेसह मोटार वाहन कायद्यानुसार कारवाई करण्यात आली.
रत्नागिरी शहर व परिसरातही वाहतुकीला अडथळा निर्माण करणाऱ्यांवर पोलिसांनी कारवाई केली. कांचन हॉटेल ते बाफना मोटर्स मार्गावरील प्रगती टाईल्स अँड मार्बलसमोर ट्रक उभा करणाऱ्या गोपाळ कुमार महतो याच्यावर, तर कारवांचीवाडी फाटा ते कुवारंबाव मार्गावर रिक्षा उभी करणाऱ्या अमोल विजय चव्हाण याच्यावर गुन्हा दाखल करण्यात आला. कुवारंबाव ते कारवांचीवाडी मार्गावर डंपर उभा करणाऱ्या मोहम्मद जमाल अकबर अन्सारी याच्यावरही कारवाई करण्यात आली. रहाटाघर ते जयस्तंभ मार्गावर इर्टिगा रस्त्यावर उभी करणाऱ्या सन्मान जगदीश पेंडणेकर याच्याविरुद्धही गुन्हा दाखल करण्यात आला.
दापोली शहरात बसस्थानकासमोरील मुख्य मार्गावर रिक्षा, कार आणि अन्य वाहने उभी करून वाहतुकीस अडथळा निर्माण करणाऱ्या वाहनचालकांविरोधात सलग कारवाई करण्यात आली. रफिक युसूफ मुजावर, राजेंद्र हरिश्चंद्र पवार, योगेश बळीराम गायकवाड, महेंद्र महादेव दवंडे, यशवंत बापू कांबळे आणि कल्याण कृष्णा मिसाळ यांच्याविरुद्ध स्वतंत्र गुन्हे दाखल करण्यात आले. बसस्थानकासमोरील मार्गावर वारंवार होणाऱ्या अशा प्रकारच्या पार्किंगमुळे वाहतुकीवर परिणाम होण्याची शक्यता लक्षात घेऊन पोलिसांनी कारवाई केल्याचे नोंदीवरून स्पष्ट होते.
More Read
सावर्डे-वहाळ फाटा परिसरात प्रवासी बोलेरो रस्त्यावर उभी केल्याप्रकरणी शेखर शिवाजी भागडे याच्यावर, तर गुहागर-चिपळूण मार्गावरील शृंगारतळी पोलिस चौकीसमोर मॅक्सिमो वाहन उभे करणाऱ्या वैभव प्रविण मांडवकर याच्यावर गुन्हा दाखल करण्यात आला. देवरुख कोंडगाव साखरपा एसटी स्टँडबाहेर टाटा सुमो उभी करणाऱ्या सुदेश रघुनाथ सुर्वे याच्यावरही पोलिसांनी कारवाई केली. संगमेश्वर एसटी स्टँडसमोर अल्टो कार उभी करणाऱ्या अमित श्रीपाद सावंत याच्याविरुद्ध गुन्हा दाखल झाला आहे.
पुणगड-पावसगड परिसरातही सार्वजनिक रस्त्यावर टाटा सुमो वाहने उभी करून वाहतुकीस अडथळा निर्माण केल्याप्रकरणी अन्वर अहमद फजलानी, मुकेश प्रमोद साखरकर आणि किरीट गणपत आडिवरेकर यांच्याविरुद्ध स्वतंत्र गुन्हे दाखल करण्यात आले. या वाहनांमुळे येणाऱ्या-जाणाऱ्या वाहनांना तसेच नागरिकांना अडथळा निर्माण होण्याची शक्यता असल्याचे पोलिस नोंदीत नमूद करण्यात आले आहे.
सार्वजनिक रस्त्यावर वाहन उभे करताना वाहतुकीस अडथळा होणार नाही, याची खबरदारी घेणे आवश्यक आहे. मात्र, अनेक ठिकाणी रस्त्याच्या कडेला किंवा मुख्य मार्गावर वाहने उभी केल्यामुळे वाहतुकीची कोंडी होण्याबरोबरच पादचाऱ्यांच्या सुरक्षिततेचाही प्रश्न निर्माण होत असल्याचे पोलिसांच्या कारवाईतून समोर आले आहे. विशेषतः महामार्ग, घाटमार्ग, बसस्थानक परिसर आणि बाजारपेठांमध्ये अशा प्रकारे वाहने उभी केल्यास अपघाताचा धोका वाढू शकतो.
या सर्व प्रकरणांमध्ये भारतीय न्याय संहितेच्या कलम २८५ अंतर्गत कारवाई करण्यात आली आहे. सार्वजनिक रस्त्यावर अशा पद्धतीने वाहन उभे करून इतरांच्या सुरक्षिततेला धोका किंवा वाहतुकीला अडथळा निर्माण करणाऱ्यांविरोधात पोलिसांकडून कारवाई सुरू राहणार असल्याचे या मोहिमेतून स्पष्ट झाले आहे. जिल्ह्यात एकाच कालावधीत ४३ गुन्हे दाखल झाल्याने रस्त्यावर बेशिस्तपणे वाहने उभी करणाऱ्यांमध्ये आता पोलिस कारवाईची धास्ती निर्माण झाली आहे.
