रत्नागिरी: समाजात सामाजिक जाणीव वाढावी आणि युवकांनी सामाजिक कार्यात सक्रिय सहभाग घ्यावा, या उद्देशाने रत्नागिरीतील संपर्क युनिक फाउंडेशन या स्वयंसेवी संस्थेने एक अभिनव उपक्रम सुरू केला आहे. राष्ट्रीय शैक्षणिक धोरण २०२० नुसार, महाविद्यालयीन विद्यार्थ्यांसाठी ‘समुदाय सहभाग कार्यक्रम’ हा अभ्यासक्रम अनिवार्य करण्यात आला आहे. याच धोरणाला अनुसरून, गोगटे जोगळेकर महाविद्यालयाने संपर्क युनिक फाउंडेशनसोबत हातमिळवणी करत आपल्या विद्यार्थ्यांना सामाजिक कार्याचे प्रशिक्षण देण्याची जबाबदारी या संस्थेकडे सोपवली आहे.
या उपक्रमाच्या पहिल्या टप्प्यात, महाविद्यालयाच्या राज्यशास्त्र आणि हिंदी शाखेतील १७ विद्यार्थ्यांना १८ ते २३ ऑगस्ट या कालावधीत विशेष प्रशिक्षण दिले जाणार आहे. या उपक्रमाचा शुभारंभ १८ ऑगस्ट रोजी करण्यात आला. यावेळी गोगटे जोगळेकर महाविद्यालयाचे राज्यशास्त्र विभागप्रमुख प्रा. निलेश पाटील, हिंदी विभागाचे समन्वयक प्रा. कृष्णात खांडेकर, तसेच संपर्क युनिक फाउंडेशनचे अध्यक्ष शकील गवाणकर, रत्नागिरी जिल्हाध्यक्ष जमीर खलफे, सचिव युसुफ शिरगावकर आणि जनसंपर्क प्रमुख नाझीम मजगावकर यांची प्रमुख उपस्थिती होती. या उपक्रमासाठी महाविद्यालयाच्या कला शाखा उपप्राचार्या प्रा. डॉ. कल्पना आठल्ये यांचे विशेष सहकार्य लाभले आहे.
या प्रशिक्षणादरम्यान विद्यार्थ्यांना सामाजिक कार्याचे महत्त्व आणि संपर्क युनिक फाउंडेशनच्या कार्याची माहिती दिली जाईल. विशेषतः, रत्नागिरी जिल्हा शासकीय रुग्णालयात येणाऱ्या रुग्ण आणि त्यांच्या नातेवाईकांना मदत कशी करावी, याचे प्रात्यक्षिक प्रशिक्षण दिले जाणार आहे. यामुळे हे विद्यार्थी समाजाप्रती आपली जबाबदारी अधिक चांगल्या प्रकारे पार पाडू शकतील.
संपर्क युनिक फाउंडेशनचे अध्यक्ष शकील गवाणकर यांनी या उपक्रमाचे महत्त्व अधोरेखित केले. ते म्हणाले की, यासारख्या उपक्रमांमुळे तरुण पिढीला समाजासाठी काम करण्याची प्रेरणा मिळेल आणि सामाजिक जाणीव अधिक दृढ होईल. त्यांनी सर्व नागरिकांना अशा सामाजिक कार्यांमध्ये सहभागी होण्याचे आवाहन केले आहे. हा अभिनव उपक्रम युवकांना केवळ पुस्तकी ज्ञान न देता, प्रत्यक्ष सामाजिक अनुभवांची शिदोरी देणारा ठरणार आहे.
