महाराष्ट्र राज्य प्राथमिक शिक्षक संघाच्या रत्नागिरी जिल्हाध्यक्षपदी दीपक मोने

चिपळूण : राज्यातील प्राथमिक शिक्षकांच्या विविध प्रश्नांसाठी सातत्याने लढा देणाऱ्या तसेच विद्यार्थीहिताला प्राधान्य देणाऱ्या महाराष्ट्र राज्य प्राथमिक शिक्षक संघाच्या रत्नागिरी जिल्हाध्यक्षपदी दीपक मोने यांची निवड करण्यात आली आहे. त्यांच्या या निवडीचे जिल्ह्यातील शिक्षकवर्गासह विविध स्तरांतून स्वागत होत असून त्यांच्यावर अभिनंदनाचा वर्षाव होत आहे.

दीपक मोने यांनी यापूर्वी महाराष्ट्र राज्य प्राथमिक शिक्षक संघाच्या जिल्हा सचिवपदाची जबाबदारी यशस्वीपणे सांभाळली आहे. या कालावधीत शिक्षकांच्या विविध प्रश्नांचा सातत्याने पाठपुरावा करून ते सोडविण्यासाठी त्यांनी प्रयत्न केले. संघटनेच्या कामकाजाला अधिक गतिमान करण्यामध्येही त्यांचे महत्त्वपूर्ण योगदान राहिले आहे.

प्रशासकीय कामकाजाचा सखोल अभ्यास, उत्तम संघटन कौशल्य, नियोजनबद्ध कार्यपद्धती आणि सर्वांना विश्वासात घेऊन काम करण्याची हातोटी ही त्यांच्या कार्यशैलीची वैशिष्ट्ये मानली जातात. शिक्षकांच्या प्रश्नांबाबत सातत्याने भूमिका घेऊन प्रशासनाकडे पाठपुरावा केल्यामुळे शिक्षकवर्गामध्ये त्यांनी विश्वास निर्माण केला आहे.

संघटनेसाठी दिलेले योगदान, प्रदीर्घ अनुभव, नेतृत्वगुण आणि शिक्षकांच्या प्रश्नांप्रती असलेली बांधिलकी लक्षात घेऊन त्यांच्यावर रत्नागिरी जिल्हाध्यक्षपदाची जबाबदारी सोपविण्यात आली आहे. संघटनेने दाखविलेला विश्वास ते सार्थ ठरवतील, असा विश्वास पदाधिकारी आणि शिक्षकांनी व्यक्त केला आहे.

दीपक मोने यांच्या निवडीबद्दल जिल्ह्यातील शिक्षक तसेच विविध संघटनांच्या पदाधिकाऱ्यांकडून त्यांचे अभिनंदन करण्यात येत आहे. त्यांच्या नेतृत्वाखाली जिल्ह्यातील प्राथमिक शिक्षकांचे प्रलंबित प्रश्न अधिक प्रभावीपणे मार्गी लागतील आणि संघटनेचे कार्य आणखी गतिमान होईल, अशी अपेक्षा शिक्षकवर्गातून व्यक्त होत आहे.