पोको एम८एक्स ५जी स्मार्टफोन भारतात २१ ऑगस्टला होणार लॉन्च

मुंबई: स्मार्टफोन निर्माता कंपनी पोको इंडियाने आपल्या आगामी पोको एम८एक्स ५जी स्मार्टफोनच्या भारतातील लॉन्चची तारीख जाहीर केली आहे. कंपनीकडून मिळालेल्या माहितीनुसार, हा स्मार्टफोन येत्या २१ ऑगस्ट रोजी दुपारी १२ वाजता भारतीय बाजारात दाखल होणार आहे.

लॉन्चनंतर हा फोन ई-कॉमर्स प्लॅटफॉर्म फ्लिपकार्टवर खरेदीसाठी उपलब्ध होणार आहे. पोको एम८एक्स ५जी हा कंपनीच्या एम८ मालिकेतील आणखी एक स्मार्टफोन असून, या मालिकेत यापूर्वी पोको एम८ ५जी आणि पोको एम८ पॉवर ५जी या मॉडेल्सचा समावेश झाला आहे.

पोकोने फ्लिपकार्टवरील मायक्रोसाइटद्वारे आगामी स्मार्टफोनच्या प्रोसेसरची माहितीही दिली आहे. पोको एम८एक्स ५जीमध्ये स्नॅपड्रॅगन ४ जेन ५ चिपसेट देण्यात येणार असून, कंपनीच्या दाव्यानुसार हा भारतातील या प्रोसेसरसह येणारा पहिला स्मार्टफोन असेल. हा प्रोसेसर मे महिन्यात झालेल्या स्नॅपड्रॅगन फॉर इंडिया कार्यक्रमात सादर करण्यात आला होता. कामगिरीच्या बाबतीत पोको एम८एक्स ५जीचा अँटुटू स्कोअर ६ लाख ५० हजारांहून अधिक असेल. स्मार्टफोनमध्ये १२ जीबीपर्यंत रॅम मिळणार असून, त्यात ६ जीबी व्हर्च्युअल रॅमचा समावेश असेल. फोनमध्ये एलपीडीडीआर४एक्स रॅम आणि यूएफएस २.२ स्टोरेज तंत्रज्ञानाचा वापर केला जाणार आहे.

फोनचे तापमान नियंत्रणात ठेवण्यासाठी ट्रिपल कूलिंग सिस्टम देण्यात आली आहे. यात १२,४३९ चौरस मिलिमीटर ग्रॅफाइट कूलिंग सिस्टम, १,९२४ चौरस मिलिमीटर कॉपर फॉइल लेअर आणि ३.५ वॅट हाय-एफिशिएन्सी थर्मल जेलचा समावेश आहे. फोन ४८ महिन्यांपर्यंत लॅगविना वापरासाठी ऑप्टिमाइझ करण्यात आल्याचा कंपनीचा दावा आहे.दरम्यान, लीक झालेल्या माहितीनुसार, फोनमध्ये ६.९ इंचाची एचडी प्लस आयपीएस एलसीडी स्क्रीन, १२० हर्ट्झ रिफ्रेश रेट, ६,००० एमएएच बॅटरी आणि ३३ वॅट फास्ट चार्जिंग सपोर्ट मिळू शकतो. भारतात या स्मार्टफोनची किंमत २० हजार रुपयांपेक्षा कमी असण्याची शक्यता व्यक्त केली जात आहे.