सामूहिक जागा खरेदीतून बहुमजली घरकुल उभारा

रत्नागिरी : ग्रामीण भागातील भूमिहीन कुटुंबांना घरकुलासाठी जागा उपलब्ध करून देताना येणाऱ्या अडचणी दूर करण्यासाठी सामूहिक जागा खरेदीचा पर्याय पुढे आला आहे. पंडित दीनदयाळ उपाध्याय घरकुल जागा खरेदी अर्थसहाय्य योजनेअंतर्गत दोन किंवा त्यापेक्षा अधिक पात्र लाभार्थी एकत्र येऊन जागा खरेदी करू शकणार आहेत. त्यामुळे महागड्या भूखंडाचा खर्च एकत्रितपणे भागविणे शक्य होणार आहे.

प्रधानमंत्री आवास योजना-ग्रामीण तसेच राज्य पुरस्कृत विविध घरकुल योजनांच्या पात्र लाभार्थ्यांना घर बांधण्यासाठी शासनाकडून मदत केली जाते. मात्र अनेक लाभार्थ्यांकडे स्वतःच्या मालकीची जागा नसल्याने घरकुल मंजूर होऊनही घर उभारण्याचा प्रश्न निर्माण होतो. ग्रामीण भागातील वाढलेल्या भूखंडांच्या किमतीमुळे ही समस्या अधिक गंभीर झाली आहे.

सामूहिक जागा खरेदीच्या माध्यमातून दोन किंवा अधिक पात्र लाभार्थी एकत्र येऊन भूखंड खरेदी करू शकतात. पात्र लाभार्थ्यांना जागा खरेदीसाठी एक लाख रुपयांपर्यंत अर्थसहाय्य मिळू शकते. त्यामुळे स्वतंत्रपणे जागा खरेदी करण्याच्या तुलनेत आर्थिक भार कमी होण्याची शक्यता आहे.

जागा खरेदी करताना भूखंडाची किंमत मनमानी पद्धतीने निश्चित केली जाणार नसून संबंधित समितीमार्फत ती ठरविण्यात येणार आहे. जागेचे ठिकाण, क्षेत्रफळ, बाजारभाव आणि इतर आवश्यक निकषांचा विचार करून किंमत निश्चित केली जाणार आहे. सामूहिक जागेवर बहुमजली घरकुल उभारण्याचा पर्यायही यामुळे शक्य होऊ शकतो.

या योजनेचा लाभ घेऊ इच्छिणाऱ्या पात्र लाभार्थ्यांनी ग्रामपंचायत किंवा संबंधित पंचायत समिती स्तरावर माहिती घेऊन आवश्यक कागदपत्रांसह अर्ज प्रक्रिया पूर्ण करणे आवश्यक आहे. सामूहिक जागा खरेदीसाठी लाभार्थ्यांची संमती तसेच भूखंडासंबंधी आवश्यक कागदपत्रांची पूर्तता करावी लागणार आहे.