लांजा : तालुक्यात चोरीच्या घटना वाढत असून, पुनस सावंतवाडी येथे एका ६८ वर्षीय महिलेच्या घरातून तब्बल ४ लाख १७ हजार रुपयांचे सोन्याचे दागिने चोरीला गेल्याची धक्कादायक घटना उघडकीस आली आहे. याप्रकरणी लांजा पोलीस ठाण्यात एका अज्ञात महिलेविरोधात गुन्हा दाखल करण्यात आला असून, पोलीस तिचा शोध घेत आहेत.
मिळालेल्या माहितीनुसार, पुनस सावंतवाडी येथील रहिवासी सविता विलास सावंत (वय ६८) यांच्या घरातून ही चोरी झाली आहे. फिर्यादी यांनी दिलेल्या तक्रारीनुसार, त्यांच्या घरातील मधल्या खोलीतील गोदरेज कपाटातील लॉकरमध्ये ठेवलेले ५८ ग्रॅम वजनाचे सोन्याचे दागिने चोरीला गेले. या दागिन्यांची एकूण किंमत ४,१७,००० रुपये आहे.
चोरीची ही घटना दिनांक २८ ऑगस्ट २०२५ रोजी सकाळी १०:०० वाजल्यापासून ते ०३ सप्टेंबर २०२५ पर्यंतच्या कालावधीत घडली असल्याचे फिर्यादीने तक्रारीत म्हटले आहे. धक्कादायक बाब म्हणजे, चोरीला गेलेले दागिने आरोपी महिला वापरत होती. फिर्यादीच्या संमतीशिवाय तिने हे दागिने चोरून नेल्याचा आरोप करण्यात आला आहे.
या घटनेची तक्रार श्रीमती सावंत यांनी १५ सप्टेंबर २०२५ रोजी लांजा पोलीस ठाण्यात दाखल केली. भारतीय न्याय संहिता कलम ३०५(अ) नुसार या प्रकरणी गुन्हा नोंदवण्यात आला आहे.
ही चोरी घरातल्याच एखाद्या व्यक्तीने किंवा जवळच्या ओळखीच्या व्यक्तीने केली असावी, असा पोलिसांचा प्राथमिक अंदाज आहे. पोलीस पुढील तपास करत असून, संशयित आरोपी महिलेला लवकरच अटक केली जाईल, असा विश्वास पोलिसांनी व्यक्त केला आहे. या घटनेमुळे परिसरात एकच खळबळ उडाली असून, नागरिकांमध्ये भीतीचे वातावरण निर्माण झाले आहे. या चोरीचा अधिक तपास लांजा पोलीस करत आहेत.
