चिपळूण : प्रथितयश प्रकाशिका कै. सौ. अंजली रवींद्र घाटपांडे यांच्या स्मृतीप्रित्यर्थ साहित्य विश्वातील मानाचा समजला जाणारा ‘स्नेहांजली पुरस्कार’ प्रतिवर्षी ‘स्नेहल प्रकाशन’च्या वतीने देण्यात येतो. सन 2025 हे पुरस्काराचे 23वे वर्ष आहे. यंदाचा स्नेहांजली पुरस्कार चिपळूण येथील साहित्य विश्वात 40 वर्ष तन-मन-धन पूर्वक काम करणारे संपादक, लेखक, कवी व थोर सामाजिक कार्यकर्ते *मा. श्री. प्रकाश देशपांडे* यांना देण्यात येणार आहे.
सदर पुरस्कार सोमवार दिनांक 6 ऑक्टोबर 2025 रोजी सायंकाळी 6.00 वाजता, एस. एम. जोशी सभागृह, पुणे-30. येथे मूर्तीशास्त्राचे गाढे अभ्यासक डॉ. गो. बं. देगलूरकर यांच्या अध्यक्षतेखाली व शुभहस्ते समारंभपूर्वक देण्यात येणार आहे. कार्यक्रमाला प्रमुख पाहुणे म्हणून भा. ज. पा. महाराष्ट्र राज्य उपाध्यक्ष मा. माधव भांडारी हे उपस्थित राहणार आहेत. या निमित्ताने श्री. आशुतोष बापट लिखित *साद मंदिरांची ओळख संस्कृतीची,* व श्रीमती वसुधा परांजपे लिखित *स्वराज्याच्या सौदामिनी* या दोन पुस्तकांचे प्रकाशन होणार आहे.
मूर्तीशास्त्राचे गाढे अभ्यासक डॉ. गो. बं. देगलूरकर हे स्नेहांजली पुरस्कार समितीचे अध्यक्ष असून सर्वश्री डॉ. मुकुंद दातार, प्र. के. घाणेकर, आशुतोष बापट, अभय भावे व स्नेहल प्रकाशनचे रवींद्र घाटपांडे हे या समितीचे सदस्य आहेत. या समितीने एकमताने मा. श्री. प्रकाश देशपांडे यांची स्नेहांजली पुरस्कार 2025 साठी निवड केलेली आहे.
मा. श्री. प्रकाश देशपांडे हे चिपळूण येथे स्थित असून गेली ४० वर्षे साहित्य क्षेत्र व सामाजिक क्षेत्रात तन-मन-धन पूर्वक काम करत आहेत. त्यांनी साहित्य संमेलन व नाट्य संमेलन चिपळूण येथे भरवून यशस्वी केली आहेत. चिपळूण येथे अथक परिश्रमाने एक प्राचीन वस्तूंचे म्युझियम उभे केले आहे. मा. प्रकाश देशपांडे संपादक, लेखक, कवी असून सध्या ते कोकण रत्ने या नावाचा ग्रंथ सिद्ध करत आहेत. त्वदियाय कार्याय या नावाचा देशपांडे यांच्यावरील गौरव ग्रंथ प्रकाशित झाला आहे. देशपांडे हे उत्तम व्याख्याते असून त्यांनी अनेक व्याख्याने विविध विषयावर दिलेली आहेत. एका अर्थाने चिपळूणचे ‘सांस्कृतिक वैभव’ म्हणून देशपांडे यांची ओळख आहे. ते साहित्य परिषदेचे कार्यकारिणी सदस्य आहेत.
आतापर्यंत ‘स्नेहांजली पुरस्कार’ महाराष्ट्रातील सुप्रसिद्ध दिग्गज लेखक व लेखिकांनी स्वीकारलेला आहे. उदा. मा. शेषराव मोरे, डॉ. वि. रा. करन्दीकर, डॉ. भीमराव गस्ती, डॉ. गो. बं. देगलूरकर, श्री. गिरीश प्रभुणे, डॉ. सदानंद मोरे, श्री. श्याम भुर्के असे अनेक.