गांग्रई येथे साकारल्या अनोख्या कलाकृती
संगमेश्वर:- कोकणचा निसर्ग सर्वांनाच भुरळ घालत असतो. देशाच्या विविध राज्यातून येथे असंख्य पर्यटक येत असतात. एवढंच नव्हे तर, परदेशी पर्यटक देखील कोकणात आले की, दीर्घकाळ रामतात. कोकणच्या निसर्गाची ओढ जशी लेखक, कवी आणि चित्रपट निर्मात्यांना आहे तशी ती चित्रकारांनाही असल्यामुळे जागतिक दर्जाचे चित्रकार शिल्पकार प्रकाश राजेशिर्के यांच्या मार्गदर्शनाने आम्ही चिपळूण तालुक्यातील गांग्रई येथे चित्रकारांसाठी कार्य शाळेचे दुसऱ्या वेळी केलेल्या आयोजनाला राज्यासह देशाच्या विविध भागातून आलेल्या कलाकारांना येथील निसर्गरम्य परिसर नक्की नवी ऊर्जा देईल असे प्रतिपादन माजी आमदार सदानंद चव्हाण यांनी केले.
कोकणातील निसर्गसंपन्न ठिकाण असलेल्या चिपळूण तालुक्यातील गांगई येथे राष्ट्रीयस्तरावरील चित्रकला कार्यशाळेचे आयोजन करण्यात आले आहे. या कार्यशाळेचे उदघाटक म्हणून माजी आमदार मा. सदानंदजी चव्हाण यांच्या शुभ हस्ते करण्यात आले यावेळी ते बोलत होते. या प्रसंगी त्यांची पत्नी व सुपुत्र पुष्कर चव्हाण तसेच कोकणचे जेष्ठ चित्रकार शिल्पकार प्रा.प्रकाश अर्जुन राजेशिर्के व चित्रकार उपस्थित होते. कार्यशाळेत भारतातील पंजाब, चेन्नई, नागपूर, नाशिक, पुणे, कोकण विभाग, मुंबई, कोल्हापूर, नवी मुंबई आदी भागांतील सुमारे ४५ चित्रकार कलाकार सहभागी आहेत. ही कार्यशाळा १३ ऑगस्ट पर्यंत असणार आहे.
कोकणातील निसर्गाचे पावसाळ्यातील मनमोहक दृश्य कलाकारांना नेहमीच आकर्षित करत आले आहे. गांग्राई येथील विविध ठिकाणांचे प्रत्यक्ष दर्शन व अनुभव घेता यावा, यासाठीच या कार्यशाळेचे आयोजन करण्यात आले आहे. यामध्ये सहभागी कलाकार निसर्गाशी समरस होत आपल्या कलाकृती साकारत आहेत. या कार्यशाळेच्या समारोपानंतर निवडक कलाकृतींचे प्रदर्शन मुंबईतील पु. ल. देशपांडे कला अकादमीच्या कलादालनात जानेवारी २०२६ मध्ये होणार आहे. या प्रदर्शनातून विक्री होणाऱ्या कलाकृतीतील काही रक्कम रत्नागिरी जिल्ह्यातील सेवाभावी संस्थांना सामाजिक बांधिलकीच्या भावनेतून आर्थिक स्वरूपात देण्यात येणार आहे.
प्रदर्शन निमित्ताने सर्व कलाकारांच्या माहिती व एका चित्रासह छोटेखानी कॅटलॉग प्रकाशित करण्यात येणार असून, “आपण काळाचे जाणकार असल्यामुळे, आपण माझ्या कला पुष्कर – राज रंगरेखा कार्यशाळेसाठी निमंत्रित आहात”, असे आयोजकांनी सांगितले आहे. या कार्यशाळेत सहभागी होणाऱ्या चित्रकारांमध्ये भगवान चव्हाण (चेन्नई), दत्तात्रय पाटोळे (मुंबई), आशुतोष आपटे (पालघर), डी.एस. राणे (मुंबई), निलेश शिंकक्कर (रत्नागिरी), जावेद मुलाणी (नवी मुंबई), शेता उरुणे (इचलकरंजी), निलेश शहेरकर (नाशिक), डॉ. सौम्या सुरेशकुमार (हैद्राबाद), डॉ. राठे (ठाणे), डॉ. सागर महाजन (मुंबई), चेतन गंगावणे (कुडाळ), प्रविण मिसाळ (चिपळूण), प्रविण उठगी (नवी मुंबई), मकरंद राणे (मुंबई), अब्दुल गफार (नागपूर), विवेक लाड (नागपूर), बालाजी भागे (पंजाब), शिवाजी रस्के (कोल्हापूर), संपत नायकवडी (कोल्हापूर), चंद्रकांत प्रजापती (गुजरात), भावेश पटेल (गुजरात), अजय दवळी (कोल्हापूर), राजेंद्रकुमार हंकारे (कोल्हापूर), संदेश मोरे (मुंबई), राजेंद्र महाजन (चोपडा), राखी अरडक (सिंधुदुर्ग), अपर्णा पवार (कराड), रचना नगरकर (मुंबई), अंकिता अस्वले (पनवेल), आकाश सूर्यवंशी (पुणे), प्रणय फराटे (मुंबई), अनुजा कानिटकर (रत्नागिरी), जनार्दन खोत (सिंधुदुर्ग) यांचा समावेश आहे.
या कार्यशाळेच्या आयोजनामागे ज्येष्ठ चित्रकार–शिल्पकार प्रकाश अर्जुन राजोशिके, पुष्कर सदानंद चव्हाण यांची पुढाकाराने भूमिका असून त्यांनी चित्ररसिकांना गांग्रई येथे येऊन थेट कलाकारांची कला साकारताना अनुभूती घ्यावी, असे आवाहन केले आहे. कोकणातील निसर्गाच्या सानिध्यात होणारी ही कार्यशाळा कलाकार, कलारसिक, कलाविद्यार्थी आणि पर्यटकांसाठी एक प्रेरणादायी व आनंददायक अनुभव ठरणार आहे, हे नक्की.
