रत्नागिरी: आगामी नगर परिषद निवडणूक २०२५ च्या पार्श्वभूमीवर शहरात कायदा व सुव्यवस्था अबाधित राखण्यासाठी, तसेच कोणतीही अनुचित घटना घडू नये यासाठी प्रतिबंधात्मक उपाययोजना करण्याच्या उद्देशाने रत्नागिरी पोलीस दलातर्फे १४ नोव्हेंबर २०२५ रोजी शहरभर रूट मार्च आणि विशेष वाहन तपासणी मोहीम राबवण्यात आली. या कारवाईमुळे नागरिकांमध्ये सुरक्षिततेची भावना अधिक दृढ झाली आहे.
रत्नागिरी शहर पोलीस ठाण्याच्या हद्दीत १४/११/२०२५ रोजी सायंकाळी ४.४० ते ५.३० वाजेदरम्यान हा महत्त्वपूर्ण रूट मार्च घेण्यात आला. पोलीस दलाची उपस्थिती दर्शवण्यासाठी आणि कोणत्याही गैरप्रकाराला आळा घालण्यासाठी काढण्यात आलेला हा रूट मार्च प्रामुख्याने संवेदनशील भागांतून गेला. यामध्ये प्रभाग क्र. ६ व ७, नाचणे पॉवर हाऊस येथून सुरू होऊन सोमेश्वर किराणा स्टोअर, विश्व नगर करलेकर वाडी, आनंद नगर सद्गुरु बैठक मार्ग, नवीन भाजी मार्केट, छत्रपती शिवाजी महाराज स्टेडियम मागील परिसर हिंदू कॉलनी आणि हिंदू कॉलनी प्रवेशद्वार, माळ नाका या मार्गांचा समावेश होता. या रूट मार्चमध्ये एक (०१) पोलीस अधिकारी, आठ (०८) पोलीस अंमलदार, एक (०१) आर.सी.पी पथक आणि तीस (३०) पोलीस जवान अशा एकूण ३९ कर्मचाऱ्यांनी सहभाग घेतला होता.
रूट मार्चनंतर रात्रीच्या वेळी कायदा अधिक कडक करताना शहर पोलीस ठाण्याच्या हद्दीतील सर्व नाकाबंदी ठिकाणी विशेष वाहन तपासणी मोहीम राबविण्यात आली. रात्री १०.०० ते ११.०० वाजेपर्यंत चाललेल्या या मोहिमेत एकूण ३० चारचाकी आणि १८ दुचाकी वाहनांची कसून तपासणी करण्यात आली. वाहतूक नियमांचे उल्लंघन करणाऱ्या ८ वाहनचालकांवर दंडात्मक कारवाई करण्यात आली असून त्यांच्याकडून एकूण ₹७,०००/- इतका दंड वसूल करण्यात आला.
या तपासणीदरम्यान विशेष बाब म्हणून, दोन (०२) बुलेट मोटारसायकल वाहनांना मॉडिफाय केलेले (बदल केलेले) सायलेन्सर आढळून आले. अशाप्रकारे नियमांचे उल्लंघन करणाऱ्या वाहनचालकांवर मोटार वाहन कायद्यांतर्गत कायदेशीर कारवाई करण्यात आली आहे. निवडणूक काळात कायदा व सुव्यवस्था राखण्यासाठी रत्नागिरी पोलीस दल अत्यंत तत्पर असून, नागरिकांनी निवडणुकीच्या नियमांचे पालन करावे आणि पोलिसांना सहकार्य करावे, असे आवाहन करण्यात येत आहे.
