गोवा : येथील श्रीसंस्थान गोकर्ण जीवोत्तम मठाच्या 550 व्या वर्षपूर्ती समारंभाच्या निमित्ताने पंतप्रधान नरेंद्र मोदी यांनी शुक्रवारी 77 फूट उंच भगवान श्रीरामाच्या कांस्यप्रतिमेचे अनावरण केले.
‘स्टॅच्यू ऑफ युनिटी’चे शिल्पकार राम सुतार यांनी ही प्रतिमा साकारली असून, ती जगातील सर्वात उंच भगवान रामांची प्रतिमा आहे. यासमारंभाला गोव्याचे राज्यपाल अशोक गजपती राजू आणि मुख्यमंत्री प्रमोद सावंत हे देखील उपस्थित होते.
याप्रसंगी पंतप्रधान म्हणाले की, “श्री संस्थान गोकर्ण पर्तगली जीवोत्तम मठ आपले 550वे स्थापना वर्ष साजरे करीत आहे. या दीर्घ प्रवासात संस्थेने काळाचे अनेक चक्रवात पाहिले. युग बदलले, काळ बदलला, समाजात विविध परिवर्तन झाले; परंतु या मठाने आपल्या मार्गदर्शक मूल्यांची कधीही तिलांजली दिली नाही. उलट, हा मठच जनसामान्यांना दिशा देणारे केंद्र म्हणून उदयास आला आणि हीच त्याची खरी ओळख आहे. यापूर्वी पंतप्रधानांनी मठ प्रांगणातील मंदिरात दर्शन घेऊन पूजा-अर्चना केली. हा मठ भारतातील सर्वांत जुने मठवासी केंद्रांपैकी एक मानला जातो. आपले आध्यात्मिक, सांस्कृतिक आणि सामाजिक योगदान यामुळे सारस्वत समुदायात त्याला अत्यंत महत्त्वाचे स्थान आहे.
श्री संस्थान गोकर्ण पर्तगली जीवोत्तम मठ हा गौड सारस्वत ब्राह्मण समुदायाचा पहिला वैष्णव मठ मानला जातो. तेराव्या शतकातील जगद्गुरु माधवाचार्यांनी स्थापन केलेल्या द्वैत वेदांत परंपरेचा हा अनुयायी आहे. दक्षिण गोव्याच्या पर्तगली येथे शांत कुशावती नदीच्या तीरावर वसलेले हे स्थळ अनेक शतकांपासून एक प्रतिष्ठित आध्यात्मिक व सांस्कृतिक केंद्र म्हणून ओळखले जाते.गोवा लोकनिर्माण विभागाचे मंत्री दिगंबर कामत यांनी सांगितले की, शतकानुशतके आध्यात्मिक केंद्र म्हणून कार्यरत असलेल्या या मठाचा संपूर्णपणे जीर्णोद्धार करण्यात आला असून त्याला आधुनिक रूप देण्यात आले आहे.
