राजापूर : मुंबई-गोवा महामार्गावरील गंगातीर्थ स्टॉप (उन्हाळे) येथे शुक्रवारी (दि. ५ डिसेंबर २०२५) सकाळी ९.२५ वाजताच्या सुमारास झालेल्या एका गंभीर अपघातामुळे महामार्गावर तणाव निर्माण झाला होता. दारूच्या नशेत असलेल्या एका ट्रकचालकाने पुढे चाललेल्या एका खासगी कारला मागून जोरदार धडक दिली. या घटनेत कारचे मोठे नुकसान झाले असून, संबंधित ट्रकचालकाविरोधात राजापूर पोलीस ठाण्यात गुन्हा दाखल करण्यात आला आहे.
रत्नागिरी येथील रहिवासी असलेले केदार लक्ष्मण माणगावकर (वय ४७, व्यवसाय ऑप्टीशियन) यांनी या घटनेनंतर तात्काळ पोलिसांशी संपर्क साधून तक्रार नोंदवली. त्यांनी दिलेल्या माहितीनुसार, फिर्यादी केदार माणगावकर हे त्यांचा मुलगा निश आणि मित्र सुनित चाळके यांच्यासह त्यांच्या निसान (क्र. एम.एच.०८ ड्रोड २८००) या गाडीतून कुडाळहून रत्नागिरीकडे प्रवास करत होते.
ते मुंबई-गोवा हायवेवरील गंगातीर्थ स्टॉप, उन्हाळे (ता. राजापूर) येथील गतिरोधकाजवळ आले असता मागून येणाऱ्या सहा चाकी ट्रक (क्र. डी.एल. ०१ एम.बी २४१८) वरील चालक राजेंद्र रामदास पाल (वय २६, रा. नमेनी, कासगंज, उत्तरप्रदेश) याने मद्यपान करून बेदरकारपणे वाहन चालवले. त्याने गतिरोधकाचा अंदाज न घेता थेट माणगावकर यांच्या कारला मागच्या बाजूने धडक दिली. धडकेमुळे कारची मागील काच फुटली आणि गाडीचे मोठे नुकसान झाले.
घटनेची माहिती मिळताच पोलिसांनी धाव घेतली आणि पंचनामा केला. ट्रकचालकाने दारूचे सेवन केले असल्याचे स्पष्ट झाले. या प्रकरणी, फिर्यादी केदार माणगावकर यांच्या तक्रारीनुसार, राजापूर पोलीस ठाण्यात आरोपी ट्रकचालक राजेंद्र पाल याच्या विरोधात भारतीय दंड संहिता (IPC) कलम २८१ तसेच मोटार वाहन कायद्याच्या (MVCC) कलम १८४, १८५ (अ) (ब) नुसार गु.आर.क्र. २३७/२०२५ अन्वये गुन्हा दाखल करण्यात आला आहे.
