खेड (प्रतिनिधी): खेड तालुक्यातील संगलट गावचे सुपुत्र आणि मुंबईतील प्रसिद्ध बांधकाम व्यवसायिक मझहर उमर नाडकर यांची कन्या डॉ. फलाह मझहर नाडकर हिने वैद्यकीय शिक्षणामध्ये उल्लेखनीय यश संपादन केले असून तिची पुढील उच्च शिक्षणासाठी निवड झाली आहे. डॉ. फलाह यांनी २०२४ साली सांगली येथील प्रकाश मेडिकल कॉलेजमधून एमबीबीएसची पदवी यशस्वीरीत्या पूर्ण केली आहे. या यशानंतर त्यांनी आपले वैद्यकीय क्षेत्रातील ज्ञान अधिक वृद्धिंगत करण्यासाठी प्रयत्न सुरू ठेवले होते, ज्याला आता मोठे यश मिळाले आहे.
डॉ. फलाह नाडकर यांनी नुकताच मुंबई येथील नामांकित के. जे. सोमय्या मेडिकल कॉलेजमध्ये एम.डी. (अॅनेस्थेशिया) या पदव्युत्तर अभ्यासक्रमासाठी प्रवेश मिळवला आहे. ग्रामीण भागातील मुले आज विविध क्षेत्रात आपल्या कर्तृत्वाचा ठसा उमटवत असतानाच, संगलट गावच्या या कन्येने मिळवलेले हे यश खेड तालुक्यासाठी अभिमानास्पद ठरले आहे. डॉ. फलाह यांच्या या संपूर्ण प्रवासात त्यांचे वडील, जे पेशाने अभियंता असून मुंबईत बांधकाम क्षेत्रात कार्यरत आहेत, त्या मझहर नाडकर यांचे त्यांना मोलाचे मार्गदर्शन आणि पाठबळ लाभले आहे. वडिलांच्या मार्गदर्शनाखाली आणि आपल्या जिद्दीच्या जोरावर डॉ. फलाह यांनी हे यश खेचून आणले आहे.
डॉ. फलाह नाडकर यांच्या या निवडीमुळे संगलट गावासह संपूर्ण खेड तालुक्यात आनंदाचे वातावरण आहे. त्यांच्या या शैक्षणिक प्रगतीबद्दल कुटुंबीय, नातेवाईक, मित्रपरिवार तसेच ग्रामस्थांकडून त्यांच्यावर अभिनंदनाचा वर्षाव होत असून, त्यांच्या पुढील वैद्यकीय वाटचालीसाठी शुभेच्छा देण्यात येत आहेत.
