दापोली : तालुक्यातील गिम्हवणे उगवतवाडी येथे विहिरीत पडून प्रीशा सुदेश वाडकर हिचा मृत्यू झाल्याची घटना रविवार 5 जानेवारी रोजी सकाळी 10:30 वाजता उघडकीस आली.
दापोली पोलिसांनी दिलेल्या माहितीनुसार, प्रीशा वाडकर (28 सध्या रा. गिम्हवणे उगवतवाडी) ही मागील 2 वर्षांपासून माहेरी तिची आई प्रतिभा मोरे यांच्यासोबत राहत होती. प्रतिभा मोरे या 7 दिवसांपूर्वी त्यांच्या सुनेच्या प्रसूतीकरिता मुंबई येथे गेल्या होत्या. 5 रोजी सकाळी 10:30 वाजण्याच्या सुमारास निखिल जाडे याने फोन करून प्रीशा हिच्या नातेवाईकांना बोलावून घेतले. नातेवाईक गिम्हवणे उगवतवाडी येथे गेले असता प्रीशा वाडकर ही विहिरीत पडलेली आढळून आली. तिला रुग्णवाहिकेने तत्काळ दापोली उपजिल्हा रुग्णालयात उपचारासाठी दाखल केले असता वैद्यकीय अधिकाऱ्यांनी तपासून तिचा मृत्यू झाल्याचे घोषित केले. दापोली पोलीस ठाण्यात आकस्मिक मृत्यू म्हणून नोंद करण्यात आली असून अधिक तपास पोलीस करीत आहेत.
