पोलादपूर / प्रतिनिधी: मुंबई-गोवा राष्ट्रीय महामार्ग क्रमांक ६६ वर पोलादपूर जवळ वनविभागाच्या पथकाने सापळा रचून गुजरात राज्यातून चिपळूणकडे होणारी अवैध खैराची तस्करी रोखण्यात मोठे यश मिळवले आहे. या धडक कारवाईत अवैध खैराचा साठा असलेला ट्रक आणि त्याला रस्ता दाखवणारा दुचाकीस्वार अशा दोघांना पकडण्यात वनविभागाच्या महाड पथकाला यश आले आहे.
मुंबई-गोवा महामार्गावरून MH-12-EQ-9866 क्रमांकाचा ट्रक संशयास्पद रित्या जात असल्याचे वनविभागाच्या कर्मचाऱ्यांच्या लक्षात आले होते. या ट्रकच्या पुढे त्याला रस्ता दाखवण्यासाठी MH-03-DD-6109 क्रमांकाची यामाहा FZ मोटारसायकल पथदर्शक म्हणून चालत असल्याचे तपासात निष्पन्न झाले. वनविभागाने तत्काळ चक्रे फिरवून ही कारवाई करत मोहम्मद अर्शद (राहणार गुलशन नगर, जिल्हा बलसाड, गुजरात) आणि मोहम्मद उस्मान मुबीन खान (राहणार मुलुंड कॉलनी, मुंबई) या दोघांना ताब्यात घेतले आहे.
या कारवाईत खैर वृक्षाचे २०१ तुकडे जप्त करण्यात आले असून त्याचे मोजमाप अंदाजे ४.५७३ घनमीटर इतके आहे. जप्त केलेल्या या मालाची बाजारभावाप्रमाणे किंमत ७,०१,८६६ रुपये इतकी असून यासह ट्रक व दुचाकी ही दोन्ही वाहनेही वनविभागाने जप्त केली आहेत. या प्रकरणी आरोपींविरुद्ध भारतीय वन अधिनियम १९२७ च्या कलम २६(१), ४१, ४२ आणि ५२ नुसार गुन्हा दाखल करण्यात आला आहे. अटकेतील आरोपींना महाड न्यायालयात हजर केले असता, न्यायालयाने त्यांना तीन दिवसांची वनकोठडी सुनावली आहे.
प्राथमिक तपासात असा संशय व्यक्त केला जात आहे की, हा ट्रक गुजरात राज्यातून येत असताना मूळ चालकाला चिपळूणचा रस्ता माहित नसल्यामुळे त्याला पनवेल येथे उतरवण्यात आले आणि तिथून पुढे दुसरा चालक वाहनावर बसवण्यात आला. मात्र, हा खैराचा साठा चिपळूणमध्ये नेमका कोणाला दिला जाणार होता आणि तो कोठे खाली होणार होता, याबाबतचा अधिक तपास वनविभाग करत आहे. ही यशस्वी मोहीम उपवनसंरक्षक रोहा व सहाय्यक संरक्षक (विकास व कॅम्प) रोहा यांच्या मार्गदर्शनाखाली वनक्षेत्रपाल आशिष पाटील, पोलादपूरचे वनपाल आणि पोलादपूर वनविभागाच्या कर्मचाऱ्यांनी पार पाडली.
