रत्नागिरी: बहुचर्चित पत्रकार शशिकांत वारिशे खून प्रकरणातील मुख्य आरोपी पंढरीनाथ आंबेरकर याला रत्नागिरी सत्र न्यायालयाने वैद्यकीय कारणास्तव सहा आठवड्यांचा अल्पकालीन जामीन मंजूर केला आहे. ७ फेब्रुवारी २०२३ रोजी अटक झाल्यापासून आंबेरकरचे यापूर्वीचे तीन जामीन अर्ज न्यायालयाने फेटाळले होते, मात्र प्रकृतीच्या कारणास्तव हा तात्पुरता दिलासा देण्यात आला आहे. या निर्णयामुळे गंभीर स्वरूपाच्या गुन्ह्यात वैद्यकीय आधारावर दिल्या जाणाऱ्या जामिनाबाबत आणि त्यातील पारदर्शकतेबाबत पुन्हा एकदा चर्चा सुरू झाली आहे.
आरोपी आंबेरकर याने प्रकृती अस्वास्थ्य आणि उपचारांचे कारण पुढे करत जामिनासाठी अर्ज केला होता. यावर सुनावणी करताना न्यायालयाने आरोपीला असलेले मधुमेह, उच्च रक्तदाब, हृदयविकार आणि मानसिक तणाव या व्याधींची दखल घेतली. आरोपीवर यापूर्वीच अँजिओप्लास्टी करण्यात आली असून, पुढील आवश्यक काळजी आणि नियमित वैद्यकीय तपासणीची गरज असल्याचे अहवालात नमूद करण्यात आले आहे. या वैद्यकीय अहवालांचा आधार घेत न्यायालयाने सहा आठवड्यांचा अल्पकालीन जामीन देणे उचित ठरेल, असा निष्कर्ष नोंदवला. विशेष म्हणजे, यापूर्वी आरोपीवर पोलीस बंदोबस्तात खासगी रुग्णालयात उपचार झाले होते, मात्र ते उपचार कारागृह व्यवस्थेत शक्य आहेत की नाही, याचा कोणताही सविस्तर तपशील आदेशात नसल्याने कायदेशीर वर्तुळात प्रश्नचिन्ह उपस्थित केले जात आहे.
न्यायालयाने जामीन मंजूर करताना गुन्ह्याचे गांभीर्य आणि आरोपीची राजकीय पार्श्वभूमी विचारात घेऊन अत्यंत कठोर अटी लादल्या आहेत. हा जामीन नियमित नसून केवळ उपचारांसाठी मर्यादित कालावधीसाठी असल्याचे स्पष्ट करण्यात आले आहे. आरोपीला राजापूर तालुक्यात प्रवेश करण्यास पूर्णपणे बंदी घालण्यात आली असून, साक्षीदारांशी कोणत्याही प्रकारे संपर्क न ठेवण्याची सक्ती करण्यात आली आहे. तसेच मुदत संपल्यानंतर आरोपीला न्यायालयात आत्मसमर्पण करावे लागणार आहे. राजापूर पोलीस ठाण्यात ३०२ कलमान्वये दाखल असलेल्या या गुन्ह्याचा खटला अद्याप प्रलंबित असून, या अल्पकालीन जामिनामुळे प्रकरणातील तातडीच्या वैद्यकीय अपरिहार्यतेचा मुद्दा ऐरणीवर आला आहे.
