खेड: तालुक्यातील बिजघर-लाववाडी परिसरातून एका १५ वर्षीय अल्पवयीन मुलीचे मध्यरात्रीच्या सुमारास अपहरण झाल्याची धक्कादायक घटना उघडकीस आली आहे. शनिवार, २१ मार्च रोजी रात्री अडीच वाजण्याच्या सुमारास ही घटना घडली असून, याप्रकरणी खेड पोलीस ठाण्यात अज्ञात व्यक्तीविरोधात गुन्हा दाखल करण्यात आला आहे. ऐन मध्यरात्री घडलेल्या या प्रकारामुळे संपूर्ण परिसरात भीतीचे आणि चिंतेचे वातावरण पसरले आहे.
याबाबत अधिक माहिती अशी की, पीडित मुलगी शनिवारी मध्यरात्रीपासून घरातून बेपत्ता असल्याचे तिच्या कुटुंबीयांच्या लक्षात आले. त्यानंतर मुलीच्या आईने आणि नातेवाईकांनी तात्काळ शेजारी-पाजारी, मित्र-मैत्रिणी आणि नातेवाईकांकडे तिचा कसून शोध घेतला. मात्र, सर्वत्र शोध घेऊनही मुलीचा कोठेही पत्ता लागला नाही. आपली मुलगी घरी येईल अशी आशा घरच्यांना होती, परंतु बराच वेळ उलटूनही ती न परतल्याने तिचे अपहरण झाल्याची खात्री कुटुंबीयांना झाली. अखेर मुलीच्या आईने खेड पोलीस ठाण्यात धाव घेऊन या घटनेची फिर्याद दिली.
खेड पोलिसांनी या तक्रारीची दखल घेत भारतीय न्याय संहिता २०२३ च्या कलम १३७ (२) अन्वये अज्ञातावर अपहरणाचा गुन्हा दाखल केला आहे. पोलीस निरीक्षक विवेक अहिरे यांच्या मार्गदर्शनाखाली पोलीस उपनिरीक्षक समेळ सुर्वे या प्रकरणाचा अधिक तपास करत असून विविध पथकांद्वारे मुलीचा शोध घेतला जात आहे. दरम्यान, अपहरण झालेल्या मुलीबाबत कोणाकडेही काही माहिती असल्यास त्यांनी तातडीने पोलिसांशी संपर्क साधावा, असे आवाहन प्रशासनाकडून करण्यात आले आहे. माहिती देणाऱ्याचे नाव गुप्त ठेवले जाईल आणि योग्य ते बक्षीस दिले जाईल, असेही पोलिसांनी स्पष्ट केले आहे. या घटनेमुळे तालुक्यातील सुरक्षेचा प्रश्न पुन्हा एकदा चर्चेत आला आहे.
