संगमेश्वर: रत्नागिरी जिल्ह्यात कालपासून सुरू असलेल्या मुसळधार पावसाने जनजीवन विस्कळीत केले आहे. जिल्ह्यातील अनेक भागांमध्ये पूरसदृश परिस्थिती निर्माण झाली असून, विविध ठिकाणी झाडे कोसळण्याच्या घटना घडत आहेत. अशातच, करंबेळे-देवरुख रस्त्यावर एक मोठे झाड कोसळल्याने या मार्गावरील वाहतूक पूर्णपणे ठप्प झाली आहे.
मिळालेल्या माहितीनुसार, संततधार पावसामुळे जमीन भुसभुशीत झाल्याने करंबेळे-देवरुख रस्त्यावर काही वेळेपूर्वी एक भलेमोठे झाड उन्मळून पडले. यामुळे रस्त्याच्या दुतर्फा वाहनांच्या लांबच लांब रांगा लागल्या असून, प्रवाशांना मोठा मनस्ताप सहन करावा लागत आहे.
या घटनेची माहिती मिळताच, संबंधित विभागाला तात्काळ कळवण्यात आले आहे. सार्वजनिक बांधकाम विभागाचे कर्मचारी आणि आपत्कालीन पथक घटनास्थळी दाखल झाले असून, झाड हटवण्याचे काम युद्धपातळीवर सुरू आहे. रस्त्यावरील अडथळा दूर करून वाहतूक लवकरात लवकर पूर्ववत करण्याचा प्रयत्न सुरू आहे.
रत्नागिरी जिल्ह्यात पावसाचा जोर कायम असल्याने नागरिकांनी सतर्क राहावे, असे आवाहन जिल्हा प्रशासनाने केले आहे. पूरप्रवण क्षेत्रात राहणाऱ्या नागरिकांनी सुरक्षित स्थळी जावे आणि अनावश्यक प्रवास टाळावा, असेही प्रशासनाने म्हटले आहे.
