रत्नागिरी: जयगड खाडीत देशी नौकेद्वारे अवैधरीत्या तस्करीचे डिझेल वाहतूक होत असल्याची गुप्त माहिती मिळाल्यानंतर सीमाशुल्क विभागाच्या (कस्टम्स) अधिकाऱ्यांनी मध्यरात्री मोठी कारवाई केली आहे. या धाडसी कारवाईत अंदाजे ५ हजार ५०० लीटर डिझेल, नौका आणि अन्य संशयास्पद साहित्य जप्त करण्यात आले असून या प्रकरणी मोठ्या तस्करी रॅकेटचा संशय व्यक्त केला जात आहे. पुणे सीमाशुल्क आयुक्तालयांतर्गत रत्नागिरी सीमाशुल्क विभागाला काही व्यक्ती मासेमारी नौका अथवा देशी बोटीच्या माध्यमातून तस्करीचे डिझेल बेकायदेशीररीत्या वाहतूक करणार असल्याची विश्वासार्ह माहिती मिळाली होती. त्यानुसार सीमाशुल्क विभागाच्या पथकांनी जयगड खाडी परिसरात उत्तर व दक्षिण किनारपट्टीवर कडेकोट नजर ठेवली होती, तर दुसरीकडे आणखी एक पथक खाडीतून जलमार्गावर गस्त घालत होते.
या मोहिमेदरम्यान २६ मे रोजी पहाटे सुमारे २.३० वाजण्याच्या सुमारास पडवे जेट्टीसमोरील खाडीत एक संशयास्पद मासेमारी नौका अथवा देशी बोट अडविण्यात आली. या बोटीची तपासणी केली असता त्यात ड्रममध्ये भरलेले अंदाजे ५५०० लीटर डिझेल आढळून आले. यावेळी बोटीवर केवळ पाच जणांचा कर्मचारीवर्ग असल्याचे निदर्शनास आले. नौकेची बारकाईने पाहणी केली असता, ती प्रत्यक्षात मासेमारीसाठी वापरली जात नसल्याचा प्राथमिक निष्कर्ष अधिकाऱ्यांनी नोंदविला आहे.
प्राथमिक चौकशीत हे डिझेल खोल समुद्रात एखाद्या बार्ज किंवा टगबोटीमधून मिळविण्यात आल्याचा संशय व्यक्त करण्यात आला आहे. सीमाशुल्क कायद्याच्या तरतुदींनुसार जप्त करण्यात आलेले डिझेल, नौका आणि इतर साहित्य जप्तीच्या कारवाईत घेण्यात आले असून ते जप्तीयोग्य असल्याचा अधिकाऱ्यांचा ठाम विश्वास आहे. जप्त केलेल्या डिझेलचे अचूक मोजमाप, किंमत तसेच जप्त नौकेचे मूल्यांकन करण्याची प्रक्रिया सध्या सुरू असून त्यास काही कालावधी लागू शकतो. दरम्यान, या अवैध साखळीमागील मुख्य सूत्रधार, तस्करीच्या डिझेलचा मूळ स्रोत आणि त्यांची नेमकी कार्यपद्धती (मोडस ऑपरेंडी) उघड करण्यासाठी सीमाशुल्क विभागाने सखोल तपास सुरू केला आहे. या धडक कारवाईमुळे किनारपट्टी भागातील इंधन तस्करीच्या प्रकारांवर मोठा आळा बसण्याची शक्यता व्यक्त होत आहे.
